ئیسرائیل ل دژی ئەمریکا دەست ب پیلانەکێ دژی ئیرانێ دکەت
ئەڤرۆ نيوز:
ل گۆر راپۆرتەکا ئاژانسا بی بی سی سەرۆک وەزیرێن ئیسرائیلێ بنیامین نەتانیاھۆ جارەکا دی ل دژی دانوستاندنێن د ناڤبەرا ئەمریکا و ئیرانێ دەست ب بزاڤەکا مەزن یا دبلۆماسی کریە، نەتانیاھۆ کۆمبوونەک ل گەل مەزنە بەرپرسێن جوھیان ل ئیسرائیلێ ساز کریە و داخواز ژ وان کریە کو ب ھەموو رەنگەکێ پشتەڤانیا حوکمەتا ئیسرائیلێ ل دژی ئیرانێ بکەن، چونکو ھەکە ئیران ببیتە خودان چەکێن ئەتۆمی دێ مەترسیەکا مەزن ل سەر ئیسرائیلێ و ھەموو رۆژھەلاتا ناڤین دروست بیت.
د پشکەکا دی یا راپۆرتێ دا ھاتیە دیا کرن کو نوونەرێ تایبەتێ نەتانیاھۆ بۆ کاروبارێ رۆژھەلاتا ناڤین چەندین جاران سەرەدانا سعوودیێ، مسر و چەندین وەلاتێن دی یێن عەرەبی کریە و داخواز ژ وان کریە کو ل ھەمبەر ئیرانێ بەرەیەکێ ب ھێز دروست بکەن، سعوودیێ ژی پشتەڤانیا خوە بۆ بزاڤێن ئیسرائیلێ دیار کریە و ل ھەمبەر وێ یەکێ ژی داخواز ژ ئیسرائیلێ کریە کو ژ بۆ شەرێ ل یەمەنێ ئەو وەلاتە ژی ھاریکار بیت و گەلەک وەلاتێن دی یێن عەرەبی ژی پشتەڤانیێ ل بزاڤێن ئیسرائیلێ ل دژی ئیرانێ دکەن و ژ بەر وێ یەکێ ژی ئەمریکا دلگرانە و پشتی وان بزاڤان نەتانیاھۆ نھا پەیوەندیێن ئیسرائیل و ئەمریکا د ئاستەکا ھەری خراب دانە.
د بەردەوامیا راپۆرتێ دا ھاتیە دیار کرن کو سعوودیە، مسر و گەلە وەلاتێن دی یێن عەرەبی ژ ھندێ دترسن کو ھەکە ئیران چەکێن ئەتۆمی بدەستڤە بینیت دێ ئەو یەک مەترسیەکا گەلەک مەزن بۆ پاشەرۆژا وان وەلاتان دروست بکەت و رێکخراوێن تیرۆرستی یێن کو ئیران پشتەڤانیا وان دکەت دێ ئالۆزیێن مەزن ل رۆژھەلاتا ناڤین دروست بکەن و ئەو خالە ژی وەسا کریە کو وەلاتێن عەرەبی ب تایبەتی ژی سعوودیە و مسر پشتەڤانیێ ل بزاڤێن نەتانیاھۆ بکەن.
د راپۆرتێ دا بەحسێ ناکۆکیێن ناڤبەرا ئۆباما و نەتانیاھۆ دا ھاتیە کرن و ھاتیە دیار کرن کو نوونەرێ ئۆباما ھەتا نھا چەندین جاران سەرەدانا ئیسرائیلێ کریە و ل گەل نەتانیاھۆ کۆمبوویە و داخواز ژێ کریە کو دژبەریا سیاسەتا ئۆبامای نەکەت، چونکو ئارمانجا سەرەکی یا ئۆباما ئەوە دا کو نەھێلیت ئیران ب چو رەنگەکێ چەکێن ئەتۆمی دروست بکەت و ل ھەمبەر وێ یەکێ ژی نەتانیاھۆ دیار کریە کو سیاسەتا ئۆباما ل ھەمبەر ئیرانێ و تیرۆرێ وەسا کریە کو مەترسیێن مەزن بۆ مە دروست ببن و ئیسرائیل دێ ھەموو رێکەکێ بکار بینیت دا بەرژەوەندیێن خوە ب پارێزیت و نەھێلیت چو مەترسی بۆ پاشەرۆژا وێ دروست ببن.
ل ئالیێ دی ھاتە راگەھاندن پشتی ئالۆزبوونا پەیوەندیێن تورکیا و ئیرانێ دو رۆژ بەری نھا ل ئوروپا شاندەکێ ئیسرائێلی ل گەل شاندەکێ تورکیا ھەڤدیتنەک ساز کرینە و سەبارەت ب پرسێن رۆژھەلاتا ناڤین گەنگەشە ھاتینە کرن و رۆژناما رادیکال یا تورکیا ژی دیار دکەت کو ئیسرائیلێ دڤێت ژ ناکۆکیێن ناڤبەرا ئیران و تورکیا مفا وەربگریت و پەیوەندیێن خوە ل گەل تورکیا باش بکەت و ب رێیا تورکیا دژبەریا سیاسەتا ئەمریکا ل ھەمبەر ئیرانێ بکەت و وێ کارتێ باش بکار بینیت.