ئیسلامیێن کوردستانێ دخوازن مەلا کرێکار ڤەگەڕێت
ئه‌ڤرۆ:
دوھی دادگەھەکا وەلاتێ نەرویج بڕیارا ئازادکرنا نەجمەدین فەرەج یێ بەرنیاس ب (مەلا کرێکار) دەرکر و ھاتە ئازادکرن ژ زیندانێ، ئەڤە ددەمەکیدایە مەلا کرێکار رۆژا ٢٧-٣-٢٠١٢ێ ب تۆمەتا تیرۆرێ حوکمێ ١٠ سالێن زیندانیکرنێ بۆ دەرچوو بوو، ھندەک ژ ئیسلامیێن کوردستانێ دخوزان مەلا کرێکار ڤەگەڕێت ھەرێما کوردستانێ و پارتی و ئێکەتی ژی دبێژن، ب تۆمەتا تیرۆرێ سکالا یێن ل سەر ھەین و نابیت ڤەگەریتە ھەرێما کوردستانێ.
شوان قەلادزەیی، سەرۆکێ فڕاکسیۆنا بزاڤا ئیسلامی ل پەرمانێ کوردستانێ بۆ رۆژناما ئەڤرۆ گۆت” ئەم وەکی بزاڤا ئیسلامی کەیف خۆشین ب ئازادکرنا مەلا کرێکاری و پشتڕاستین تۆمەت بۆ ھاتبوونە چێکرن، ھەکە ڤەگەڕیت کوردستانێ، ئەم دێ پێشوازیێ لێکەین و کەس یێ بێ بەھر نینە ژ کێماسیان، ھەکە مەلا کریکار ل سەر دۆسێیا شەڕێ ناڤخوەیی بچیتە دادگەھێ، دڤێت گەلەک کەس سەرا وی شەڕی بچنە ھەمبەر دادگەھێ، پێدڤیە ل ھەرێما کوردستانێ ئاشتەوایی ھەبیت بۆ ڤان کەسێن ل دەرڤە، کو سیاسەتا خوە بگوھڕن و ل گەل رەوشا نوکە یا ھەرێما کوردستانێ بگونجیت، ل سەر حوکمەتا ھەرێمێ یا فەرە ڤان کەسێن وەکی مەلا کرێکاری ڤەگەڕینیت و چو کەس وەکی ئۆپۆزسیۆن ل دەرڤە نەمینن”.
شوانی دیارکر” بۆچی حەیدەر عەبادی و مالکی بەرھەڤن ل گەل عزەت دۆری ئاشتیێ بکەن و ئەم بەرھەڤ نەبین ل گەل مەلا کرێکاری بکەین؟، مەرج نینە ئەوا بۆری مەلا کرێکار دۆبارە بکەت و دبیت گۆھرۆِین ب سەردا بھێن و دژی بەرژەندیێن مللەتێ کورد کار نەکەت، نابیت کەسەکی دژیانا خوەدا تێبینی ل سەر ھەبووینە، ھەر بادەکا وی بمینیت و نەھێتەگرتن، مەلا کرێکار ب ھەموو خرابیێن خوەڤە پێشمەرگە و نڤیسەر بۆ ژی”.
فازل بەشارەتی، بەرپرسێ لقێ ١٢ یێ پارتی دیموکراتی کوردستان بۆ ئەڤرۆ دیارکر، مەلا کرێکار ئاریشێن سیاسی و قانوونی یێن ھەین و نابیت ڤەگەڕیت کوردستانێ و گۆت” ھەر کەسەکێ دەستێ وی ب خوینا مللەتێ مە سۆرببیت، ئەم وەکی پارتی دیموکراتی کوردستان دژی ڤەگەڕاندنا وینە بۆ کوردستانێ، ئەو کەسێن تاوان ل ھەرێما کوردستانێ کربن وەکی مەلا کرێکاری ئەو ب خوە بڕیارا ڤەگەڕیانێ بدەن، چونکو ھەرێما کوردستانێ وەکی بەرێ نینە، ھەر کەسەکێ قەسابخانەک ئەنجامدابیت و بھێتە ناڤ خەلکی بگەڕھیت، نوکە قانوون یا دھێتە بجھئینان و ئەڤ خەلکێ تاوانبار نەشێن ژیانا سیاسی و جڤاکی دەرباز بکەن، پارتی ژ دەرڤەی قانوونێ چو ئاخڤتن ل سەر کەسێ نینە، مەلا کرێکار ڤەگەڕیت کوردستانێ، خەلکی سکالا یێن ل سەر ھەین و کۆڕێن خەلکی یێن کوشتین”.
بەشارەتی گۆت ژی” ھەکە بھێت و مەلا کرێکار ڤەگەڕیت بۆ کوردستانێ و ل ھەمبەر دادگەھێ بێ گونەە دەرچوو، پارتی چو نیەتێن کەسایەتی ل گەل ناڤبری نینن، بەلێ وی کرێکار دو ئاریشە یێن ھەین، یا ئێکێ قانوونی و یا دویێ سیاسیە، ژ بەر کو بەری نوکە کارێ سیاسی کریە و نەشیایە خوە ل گەل رەوشا کوردستانێ بگونجینیت، سیاسیەکێ ساخلەم نەبوویە و گروپا وی وەکی تیرۆرستان ئاریشە بۆ خەلکی پەیداکرینە و کەسوکارێن خەلکێ ژلایێ وانڤە ھاتیە کوشتن داخوازا مافێ خوە دکەن”.
ب گۆرەیپێزانینێن رۆژناما ئەڤرۆ، مەلا کرێکار ل سالێن ھەشتیان دا حزبەک بناڤێ (کات) دامەزراندیە و پاشی چوویە رێزێن بزاڤا ئیسلامیا کوردستانێ و چەندین پلە ھەبووینە وەکی بەرپرسێ مەکتەبا عەسکەری و ئەندامێ مەکتەبا سیاسی، پشتی سالا ٢٠٠٠ ژ بزاڤا ئیسلامی جۆدابوویە و گروپا چاکسازی و پاشی (جندولئیسلام) و (ئەنسارولئیسلام) دامەزراندینە، گروپا (ئەنسارولئیسلام) کو مەلا کرێکار ئەمیرێ وێ بوو ل شەڕێ ل گەل ئێکەتیێ ل دەڤەرا ھەورامان پتری ١٠٠ پێشمەرگان کوشتن، کو ئێک ژوان شەوکەتێ حاجی موشیر ئەندامێ سەرکردایەتیا ئێکەتیێ بوو.
بۆ وەرگرتنا بۆچوونا ئێکەتیێ، رۆژناما ئەڤرۆ چەندین جاران پەیوەندی ب سەعدی پیرە ئەندامێ مەکتەبا سیاسی کر، بەلێ بەرسڤا ئەڤرۆ نەدا.
