ئێكه‌تى ئه‌ڤرۆ دێ كۆم بيت
ئه‌ڤرۆ نيوز:
ئاخفتنكه‌رێ ب ناڤێ ئێكه‌تيێ راگه‌هاند كو مه‌كته‌با سياسى يا ئێكه‌تى نشتيمانى كوردستان ل سه‌ر پرسا پێكئينانا حوكمه‌تێ و دووماهى لێكتێگه‌هشتن ل گه‌ل پارتى ديموكراتى كوردستان كۆم بيت.
سه‌عدى ئه‌حمه‌د پيره، ئاخفتنكه‌رێ ب ناڤێ مه‌كته‌با سياسى يا ئێكه‌تيێ گۆت: “مه‌كته‌با سياسى يا ئێكه‌تيێ ل ده‌مژمێر 11:00ى سپێده‌هيا ئه‌ڤرۆ رۆژا شه‌مبى ل باژێرێ سلێمانيێ، ب سه‌رپه‌رشتيا كوسره‌ت ره‌سۆل عه‌لى، جێگرێ ئێكێ يێ سكرتێرێ گشتى يێ ئێكه‌تيێ بۆ دانوستاندنێ ل سه‌ر پرسا پێكئينانا كابينا نوو يا حوكمه‌تا هه‌رێما كوردستانێ و دووماهى لێكتێگه‌هشتن ل گه‌ل پارتى ديموكراتى كوردستان كۆم بيت.
سه‌عدى پيره گۆتژى: “د كۆمبوونێ دا، دێ دانوستاندن ل سه‌ر پێنگاڤێن نوو و دووماهى لێكتێگه‌هشتن ده‌رباره‌ى پێكئينانا حوكمه‌تێ و پرسێن په‌يوه‌نديدار ب به‌غدا و كه‌ركووك، هه‌ڤده‌م كۆمبوون يا گرێدايه ب ئاماده‌كاريێن ئێكه‌تيێ بۆ كۆمبوونا هه‌ڤپشكا ناڤبه‌را پارتى و ئێكه‌تى كو بڕياره ل ڤان نێزيكان بهێته ئه‌نجام دان كو به‌رى 18ى هه‌يڤێ يه”.
5ى شوباتا 2019ێ مه‌كته‌با سياسى يا پارتى ديموكراتى كوردستان و ئێكه‌تى نشتيمانى كوردستان ل هه‌ولێر ل سه‌ر پێكئينانا كابينا نوو يا حوكمه‌تێ و پرسا كه‌ركووك و به‌غدا گه‌هشتنه رێكه‌فتنێ و هه‌تا 17ى ڤێ هه‌يڤێ پێدڤيه رێكه‌فتنا وان بهێته ئيمزاكرن.
بڕياره پشتى ئيمزاكرنا رێكه‌فتنێ ل 18ى شوباتا 2019ێ په‌رله‌مانێ كوردستانێ كۆم ببيت و ده‌سته‌يا سه‌رۆكاتيا په‌رله‌مانى هه‌لبژێرن و پاشان ژى به‌ربژاره‌ك بۆ كابينا نوو يا حوكمه‌تا هه‌رێمێ هێته ده‌ست نيشانكرن.
