ئێكه‌تى داخوازا دانوستاندنێ ل گه‌ل پارتى دكه‌ت
ئه‌ڤرۆنيوز:
مه‌كته‌با سياسى يا ئێكه‌تى نيشتمانى كوردستان ئه‌ڤرۆ ئێكشه‌مبى 28/10/2018 كۆمبوو وتێدا به‌حسێ ئه‌نجامدانا دانوستاندنان ل گه‌ل پارتى ولايه‌نێن سياسى بۆ پرسا پێكينانا كابينا نوو يا حوكمه‌تا هه‌رێما كوردستانێ هاته كرن.
مالپه‌رێ فه‌رمى يێ ئيكه‌تيێ به‌لاڤكر” دكۆمبوونێ دا ره‌وشا سياسى يا عيراقێ وگوهۆرينێن ده‌ڤه‌رێ هاتن هه‌لسه‌نگاندن ودووپاتى ل هه‌ڤپشكيا راسته‌قينه دحوكمرانيێ دا وبجهئيننا دستوورى هاته كرن، هه‌روه‌سا دووپاتى ل سه‌ر وێ چه‌ندێ ژى هاته كرن كو ل قۆناغا نوو يا سياسى وحوكمرانيا عيراقێ ب دانوستاندنێ ول به‌ر رۆناهيا دستوورى كێشێن دناڤبه‌را هه‌رێمێ وبه‌غدا بهێنه چاره‌كرن”.
مالپه‌رێ ناڤبرى به‌لاڤكر ژى كو ئێكرێزيا لايه‌نين سياسى ورێكخستنا ناڤمالا كوردستانى ته‌وه‌ره‌كێ دى يێ كۆمبوونێ بوو ول دۆر وێ چه‌ندێ هاته دووپاتكرن كو باشترين رێ بۆ وێ چه‌ندێ دانوستاندنا به‌رپرسيارانه‌يه دناڤبه‌را ئيكه‌تيێ وپارتى ولايه‌نێن سياسى يێن دى يێن كوردستانى بۆ پێكئينانا كابينا نوو، ئێكه‌تى ژى دێ پێنگاڤێ هاڤێژيت بۆ ره‌خساندنا ده‌ليڤێ بۆ ده‌ستپێكرنا دانوستاندنان”.