ئێكه‌تى دێ كۆنگره‌ى گێريت و سكرتێره‌كى هه‌لبژێريت
ئه‌ڤرۆ نيوز:
زوبێر ئوسمان جێگرێ ئێكێ يێ سكرتێرێ جڤاتا ناڤه‌ندى يا ئێكه‌تى نشتيمانى كوردستان د چاڤپێكه‌فتنه‌كێ دا راگه‌هاند: “ئه‌گه‌ره‌كێ مه‌زن هه‌يه ئێكه‌تى ل دووماهيا ئه‌ڤ ساله كۆنگرێ خوه يێ ئاسايى بگوهۆڕيت”. گۆتژى: “ئێكه‌تى مام جه‌لال دێ كه‌ته سكرتێرێ گشتى و هندى ئه‌و د ژيانێ دا مابيت چو كه‌سان چاڤ ل پۆستێ وى نينه”.
زۆبێر ئوسمان بۆ حه‌فتيناما باس ئه‌و ئێك پشت راست كر كو چه‌ند ساله ده‌مێ كۆنگره‌ى يێ ب سه‌رڤه‌چوويى، “به‌لێ ب پشت راستى ڤه، ئێكه‌تى دێ كۆنگره‌ى گێريت، هه‌تا نوكه ژڤانێ كۆنگره‌ى نه‌هاتيه ده‌ستنيشانكرن، هه‌ر چه‌نده كار بۆ دهێته كرن و ئه‌گه‌ره‌كێ مه‌زن ژى يێ هه‌يى ل دووماهيا ئه‌ڤ ساله دا كۆنگره بهێته كرن”.
خۆيا ژى كر كو هه‌كه كۆنگره بهێته گێران “ب پشت راستى ڤه دێ هه‌ر مام جه‌لال هێته هه‌لبژارتن”، “هنده مام جه‌لال د ژيانێ دا مابيت كه‌سێ ته‌ماعى ل سه‌ر وى پۆستى نينه”.
د به‌رسڤا وێ چه‌ندێ دا كو مام جه‌لال شيانێن بڕياردانا سياسى نه‌ماينه و بۆچوونه‌ك هه‌يه ئه‌و وه‌كو سكرتێرێ فه‌خرى بمينيت و كه‌سه‌كێ دى ل جهێ وى بهێته دانان، سكرتێرێ ئێكێ يێ جڤاتا ناڤه‌ندى يا ئێكه‌تيێ گۆت: “ئه‌و ژى ئه‌گه‌ره‌كه و دشيان دايه دانوستاندن ل سه‌ر بهێته كرن، به‌لێ باوه‌ر ناكه‌م هندى بێهنا مام جه‌لال ب سه‌ركه‌ڤيت كه‌س هه‌ڤركيێ ل گه‌ل بكه‌ت بۆ پۆستێ وى”.
ده‌رباره‌ى وێ چه‌ندێ كا به‌رهه‌م سالح دێ جهێ سكرتێرێ گشتى گريت، زوبێر ئوسمان دا زانين كو كۆنگره ب تنێ دشێت بڕيارێ ل سه‌ر وێ چه‌ندێ بده‌ت، “به‌لێ به‌رهه‌م سالح ب خوه ژى يان هه‌ر هه‌ڤاله‌كێ دى چاڤ ل پۆستێ مام جه‌لال نينه هندى يێ ساخ بيت، به‌لكو كار ژ بوو وێ چه‌ندێ دكه‌ن درێژاهيێ ب رێبازا وى بده‌ن ب ره‌نگه‌كێ ساخله‌م”.
