ئێكه‌تيا وه‌به‌رئێنه‌ران:كريا خانى وشوقان ل دهۆكێ ب رێژا 50% هاتيه خار
ئه‌ڤرۆنيۆز، ئه‌ياد به‌روارى
ئێكه‌تيا وه‌به‌رئێنه‌رێن كوردستانێ راگه‌هاند، كريێن يه‌كه‌يێن ئاكنجيبوونێ (شوقه و خانى) ل هه‌رێما كوردستانێ ب رێژه‌كا به‌رچاڤ يێن هاتينه خار، دياركر ژى كو كريێن شوقه وخانيان ل دهۆكێ ب رێژا 50% يێن هاتينه خار.
ياسين مه‌حموود په‌يڤدارێ ئێكه‌تيا وه‌به‌رئێنه‌رێن كوردستانێ بۆ (ئه‌ڤرۆ نيۆز) گۆت ( ل دووڤ ڤه‌كۆلينه‌كا مه ل ئێكه‌تيا وه‌به‌رئێنه‌ران ل پارێزگه‌هێن هه‌ولێر و سلێمانيێ و دهۆكێ ئه‌نجامداى، ل پارێزگه‌ها هه‌ولێرێ رێژا 60 هه‌تا 65% كريێن خانى و شوقان يێن هاتينه خار هه‌مبه‌ركرن ل گه‌ل سالا 2013، ل پارێزگه‌ها سلێمانيێ ژى رێژا 50 هه‌تا 55% كرێ يێن هاتينه خار، ل دهۆكێ ژى رێژا 45 هه‌تا 50% يێن هاتينه خار).
گۆت ژى (هه‌ر چه‌نده هژماره‌كا مه‌زن يا ئاواران ل پارێزگه‌ها دهۆكێ يێن هه‌ين، به‌لێ كريا خانى و شوقان ل هه‌ولێرێ و سلێمانيێ پتر يێن هاتينه خار ژ دهۆكێ),
خوياكر ژى (ڤه‌كۆلينا مه هزار يه‌كه‌يێن ئاكنجيبوونێ ژ خانى و شوقان بخوه‌ڤه گرتبوو، كا ل سالا 2013 كريێن وان چه‌ند بوون و ل سالا 2017 بووينه چه‌ند. بۆ نموونه ل سالا 2013 شوقه‌يه‌ك ل هه‌ولێرێ ب گۆژمێ مليۆنه‌ك و 200 هزار ديناران ب كرێ هاتبوو دان، به‌لێ دسالا 2017 دا كريا وێ شوقێ بوويه 500 هزار دينار، ئانكو 700 هزار دينار ژ كريا وێ كێم بووينه. ل سلێمانيێ ل سالا 2013 شوقه هه‌بوون ب 500 هزار ديناران ب كرێ هاتبوونه دان، نوكه ب 230 هزار ديناران ب كرێ هاتيه دان).
گۆت ژى (بهايێ خانوبه‌ران ژى يێ هاتيه خار، ل هه‌ولێرێ ب رێژا 60 هه‌تا 65% و ل سلێمانيێ 55% و ل دهۆكێ ب رێژا 45 هه‌تا 50% هاتيه خار، بۆ نموونه ل سلێمانيێ شوقه‌ك ل پرۆژه‌كێ ئاكنجيبوونێ ب 85 هزار دۆلاران بوو ل سالا 2013 و نوكه بهايێ وێ 40 هزار دۆلاران به‌لێ هه‌ر خواست ل سه‌ر نينه). دياركر ژى ( هه‌رچه‌نده به‌رى نوكه نوكه بهايێ خانوبه‌ران يێ گران بوو، به‌لێ خواست ل سه‌ر هه‌بوو وبازارێ وان هه‌بوو، نوكه بهايێن وان دئه‌رزانن به‌لێ خواست ل سه‌ر نه‌مايه، ژئه‌گه‌رێ قه‌يرانا دارايى ل هه‌رێما كوردستانێ).