ئێكه‌مین جاره بالنده‌كێ ب ڤى ره‌نگى ل ڤێ ده‌ڤه‌رێ دهێته دیتن
ئەڤرۆ نیوز ، زنار تۆڤى :
وه‌لاتیه‌كێ گوندێ بازێ ل ده‌ڤه‌را به‌روارى بالا بالنده‌كێ تاووس ل چیایێ مه‌تینا دیتیه و بۆ رۆژناما ئه‌ڤرۆ دبێژیت:ئه‌ڤه ئێكه‌مین جاره ئه‌و بالنده‌كێ ژ ڤى جۆرى ل ڤێ ده‌ڤه‌رێ دبینن و وى ل گه‌ل هه‌ڤالێن خوه گه‌له‌ك زه‌حمه‌ت دیتیه هه‌تاكو ئه‌و شیاین وى بالندێ تاووس بگرن.
محه‌مه‌د مه‌حمود ئه‌و وه‌لاتیێ گوندێ بازێ یه زێده‌تر دبێژیت : ل رۆژا ئه‌ینى ئه‌و ل گه‌ل دو هه‌ڤالێن خوه یێن دیتر قه‌ستا چیایێ مه‌تینا كرینه بۆ گه‌ریانێ و ئینانا هنده‌ك گیایێ بهارى ، پشتى ماوه‌كێ درێژ ئه‌و ل چیایێ مه‌تینا گه‌ریاین ژ نشكه‌كێڤه وان ئه‌ڤ گیانه‌وه‌رێ تاووس دیتیه ، ئێكسه‌ر وان ژى قه‌ستا وى بالنده‌ى كریه داكو بگرن ، لێ ئه‌و بالندى تاووس چه‌نده‌كێ فریه ، لێ وان هه‌ر بزاڤ كرینه بگرن و بۆ ماوێ ده‌مژمێره‌كێ ئه‌و ماینه ب دووڤ وى بالنده‌ى ڤه و گه‌له‌ك پێڤه وه‌ستیاینه هه‌تاكو شیایى بگرن و هه‌كه ئه‌و هه‌رسێ نه‌بانه و هه‌كه گیا ژى یێ بوور نه‌با نه دشیان بگرن .
ناڤهاتى گوت ژى : پشتى مه ئینایه مال ژى مه گه‌له‌ك پرسیارا خه‌لكێ و دانعه‌مرێن ده‌ڤه‌را به‌روارى بالا كریه ، كا ئه‌ڤ جۆرێ گیانه‌وه‌رى ل ڤێ ده‌ڤه‌رێ هه‌بوویه یان نه ، لێ هه‌موو یان ئاماژه ب هندێ دایه كو ئه‌ڤ جۆرێ گیانه‌وه‌رى ل ده‌ڤه‌را مه نه‌بوویه ، لێ ئه‌م ژى نزانین ژ كیڤه هاتیه و ئه‌م ژى حێبه‌تى ماین ،ژبه‌ركو مه چه‌ندین جاران قه‌ستا ڤى چیایى كریه ، لێ مه ئه‌ڤ گیانه‌وه‌ره نه دیتیه، هه‌ر چه‌نده یێ بتنێ ژى بوویه ل وى چیایى ، له‌وما ئه‌ڤه ئێكه‌مین جاره ئه‌ڤ جۆرێ بالنده‌ى ل ڤێ ده‌ڤه‌رێ دهێته دیتن.
