ئێك ژ سه‌يرترين هێرشێن ئه‌لكترۆنى ل فره‌نسا هاته تۆماركرن
د روودانەکا ئێکەم جار دا د جۆرێ خوە دا، ب سەدان مارکێتێن مەزن و جهێن فرۆتنا کەرەستەیان ل سەرتاسەری فڕەنسا تووشی هێرشەکا سایبەری یا دوقۆلی و نەئاسایی بوون، کو سیستمێن تەزاندن و سارکەران کربوونە ئارمانج. ئەڤ چەندە بوویە ئەگەرێ بلندبوونا ژ نشکەکێ ڤە یا پلەیێن گەرمییا به‌رادان بۆ زێدەتر ژ 50 پلەیێن سیلیزی و د هندەک حالەتان دا گەهشتە 80 پلەیێن سیلیزی.
پەککەفتنا ب سەدان مارکێتان و زەرەرمەندبوونا زنجیرەیێن مەزن
راپۆرتێن راگەهاندنا فڕەنسی دوپات کر کو هژمارا مارکێتێن زەرەرمەند ژ 500 مارکێتان ل هەمی وەلاتێ بۆرییە. لیستێ زنجیرەیێن بازرگانی یێن مەزن و بەرنیاس بخۆڤەگرتینە، ژ وان کۆمبوونا “موشکتێر” (Les Mousquetaires) ب تنێ 300 تایێن وێ زەرەرمەند بووینە، د گەل مارکێتێن وەک “ئینتەرمارشێ” (Intermarch)، “سوپەر یو” (Super U)، “کارفۆر” (Carrefour)، و “نێتۆ” (Netto).
هێرش چەوا روودا؟
هاککەر شیاینە کەلێنێن ئێمناهییێ یێن مەترسیدار د سیستمێن تەزاندنێ دا یێن کو کۆمپانییا “دانفۆس” (Danfoss) یا دانیمارکی بەرهەم دئینیت بکار بینن. ب رێيا روویێ کۆنترۆلا گرێدای ب تۆڕا ئەنتەرنێتێ ڤە، هێرشبەران رێکخستنێن دیجیتالی یێن به‌رادان گوهۆڕین و تایبەتمەندییا “حەلاندنا بەستەکی” (Defrost) ب درێژاهییا شەڤێ هەلبژارت و کارا کر. ئەڤێ لەیزینا ب بەرنامە بوویە ئەگەرێ بلندبوونا دژوار یا پلەیێن گەرماتیێ، و ل دووڤ دا د دەمێ چەند دەمژمێرێن کێم دا بڕەکا ئێجگار مەزن ژ گۆشتی، بەرهەمێن شیری، و خوارنێن بەستەلەک ژ ناڤ چوون، زێدەباری وێ چەندێ کو د هندەک تایان دا ئاگر ژی بەربوويێ.
خوسارەتیێن دارایی یێن مەزن
ڤێ پێشێلکارییا سایبەری زیانێن بڕێڤەبرنێ و ئابووری یێن گران ل دووڤ خوە ئینان؛ ب رەنگەکی خوسارەتی ب تنێ د هندەک تایان دا ب نێزیکی چارێکا ملیۆن یۆرۆیان هاتییە خەملاندن، د دەمەکی دا کو هێشتا هەلسەنگاندنێن فەرمی بۆ سەرجەمێ خوسارەتییان ل هەمی وەلاتێ د بەردەوامن.
د گەواهیدانەکا مەیدانی دا، جولیان فریریێ، رێڤەبەرێ ئێک ژ مارکێتێن زەرەرمەند، راگەهاند و گۆت:
“ئەم تووشی هێرشەکا ئەلیکترۆنی بووین کو بەرنامێ مە یێ بڕێڤەبرنێ کربوو ئارمانج، مخابن ئەڤێ چەندێ پلەیێن گەرماتیێ د ناڤ به‌رادان دا گەهاندنە نێزیکی 80 پلەیێن سیلیزی، و بوویە ئەگەرێ حەلیان و ژناڤچوونا هەمی کەرەستەیێن مە یێن تازی و بەستەلەک. ئەم ب ڤێ خوسارەتییا مەزن خەمگینین و داخوازییا لێبۆرینێ ژ مشتەریێن خوە یێن هێژا دکەین.”
هەلویستێ کۆمپانییا چێکەر و ڤەکۆلینێن فەرمی
ژ لایێ خوە ڤە، کۆمپانییا “دانفۆس” یا دانیمارکی بەرگری ژ هەلویستێ خوە کر ب وێ چەندێ کو زۆربەی ئامیرێن زەرەرمەند کەڤن بوون و گەهشتبوونە دووماهییا ژیێ خوە یێ بکارئینانێ، ئێدی نووکردنێن بەرنامەیی یان ئێمناهییێ یێن نوو وەرنەگرتینە.
ل هەمبەر ڤێ یەکێ، ئەڤان پێشهاتێن مەترسیدار داواکارییا گشتی ل پاریسا پایتەخت پالدا کو ڤەکۆلینەکا بلەز دەستپێبکەت، دگەل رەوانەکرنا کەیسێ بۆ نڤیسینگەها نیشتمانی یا بەرەنگاربوونا تاوانێن سایبەری ژ بۆ دیارکرنا بەرپرسێن ڤێ هێرشێ و قەبارەیێ زیانان ب دروستی. د دەمەکی دا کو چ راگەهاندنەکا فەرمی ل سەر بەرپرساتیێ یان بەلگەیێن ئاشکرا ل سەر مەرەمێن هێرشبەران نینە (چ سیاسی بن یان گرێدای لایەنێن حکومی بن)، دەستهەلاتدارێن فڕەنسی و ئوروپی د بەردەوامن د بلندکرنا ئاستێ ئامادەباشییێ و هۆشداریێ دا ژ ئەگەرا بەلاڤبوونا ڤان جۆرە هێرشان بۆ وەلاتێن دی یێن ئوروپایێ.
