ئێکگرتنا پێشمەرگەیی ھەڤرکیێن ناڤخۆ یێن ئێکەتیێ دژوارتر لێ کرن
ئەڤرۆ:
پشتی سەرۆکێ ھەرێما کوردستانێ د رێنمایێن خو دا بۆ وەزیرێ پێشمەرگەیێ کوردستانێ دوپاتی ل سەر ئێکگرتنا ھێزێن پێشمەرگەی کری و گۆتی ئێدی نابیت حزبایەتی د ناڤ پێشمەرگەی دا بھێتە کرن، ھەر زوو بەرپرسێ دەستەیا کارگێریا مەکتەبا سیاسیا ئێکەتیێ مەلا بەختیار ب رەنگەکێ نەیێ ئێکسەر بەرسڤا رێنمایێن سەرۆکێ ھەرێمێ دا و دیار کر کو د ھەر بابەتەکی دا ئەگەر دانوستاندن ل گەل ئێکەتیێ نەھێتە کرن ناھێتە پەسەند کرن.
ئەڤ ھەلویستێ مەلا بەختیار بۆ ئەگەرێ نەرازیبوونێ ل دەڤ پارت و ئالیێن سیاسی یێن جودا یێن کوردستانێ و شرۆڤەکارێن سیاسی بۆ وێ چەندێ ڤەگەراند کو پۆستێ وەزیرێ پێشمەرگەی د دەستێن بزاڤا گۆڕان دا یە و سەرۆکێ ھەرێما کوردستانێ فەرماندێ گشتی یێ ھێزێن چەکدارێن کوردستانێ یە، لەوما ئەو ھەر دو دێ سەرپەرشتیا ئێکگرتنا ھێزێن پێشمەرگێ کوردستانێ کەن، لێ دیارە بالەکێ د ناڤ ئێکەتیێ دا د گەل ڤێ چەندێ نینن، ژ بەر کو وان چ رۆلێ سەرەکی د وێ ئێکگرتنێ دا نابیت، ژ بەر ڤێ چەندێ یێ بزاڤان دکەن کو ئاستەنگا بێخنە بەرامبەر ڤێ پێنگاڤا گرنگ و مێژوویی.
نەبتنێ بزاڤا گۆڕان و پارتی رەخنە ل وی ھەلویستێ بالێ بالادەستێ ناڤ ئێکەتیێ دا گرتن، بەلکو ھەتا ئەندام مەکتەب سیاسیێن ئێکەتیێ و سەرکردە و بەرپرسێن بالا یێن وێ حزبێ ژی ب رەنگێن جودا جودا رەخنە ل وی ھەلویستی گرتن.
جەعفەر شێخ موستەفا ئەندامێ مەکتەبا سیاسیا ئێکەتیێ و فەرماندێ گشتی یێ ھێزا ٧٠ یا سەر ب ئێکەتیێ ڤە د بەرسڤا مەلا بەختیار دا گۆت: (پشتەڤانیێ ژ پرۆژێ سەرۆکێ ھەرێمێ دکەم یێ کو بۆ ئێکگرتنا ھێزێن پێشمەرگەی راگەھاندی، نابیت چ تشت ژ دەرڤەی قانوونێ بن، ژ بەر کو مە حکوومەت و پەرلەمان و سەرۆکاتیا ھەرێمێ یا ھەی و پێدڤیە پێشمەرگە ئێک بگریت و ببینە خودان پێشمەرگەیێن خودان تەدریب و پرچەک و ئامادە).
د بەردەوامیا ئاخفتنێن خو دا جەعفەر شێخ موستەفا دبێژیت: (نابیت چ حزبان ھێز ھەبیت، ژ بەر کو ھێزا حزبی د ڤی بارودوخێ نوکە دا کو مە حکوومەت و دەستھەلات یا ھەی دێ گەفان ل ڤان دەستکەفتان کەت و دەمێ مە ل چیای شورش کری، مە ل پێناڤی ڤان دەستکەفتان یا کری و پێدڤیە پۆلیس و ئاسایش و پێشمەرگە ئێک رەنگ و ئێک دەنگ بن و یێن خەلکی بن).
د پشکەکا دی یا ئاخفتنێن خو دا جەعفەر شێخ موستەفا ب رەنگەکێ نەیێ ئێکسەر ب دژواری رەخنێ ل مەلا بەختیار دگریت و دبێژیت: (جەنابێ مام جەلال و مەکتەبا سیاسی بریار یا ل سەر ئێکخستنا ھێزێن پێشمەرگەی دای و جەنابێ مام جەلال فەرمان یا ب من کری کو ھێزا پێشمەرگەی ئێک بگریت، لەوما ھەر کەسەک داخویانیا ل دژی وێ چەندێ بدەت، ئانکو ئەو ل دژی بریار و فەرمانێن مام جەلالە و ئەڤە قابلی قەبوولکرنێ نینە و کەس ژی گوھێ خو نادەتێ و ھەر کەسێ بەحسێ ئێک نەگرتنا پێشمەرگەی بکەت، ئەو ئاخفتنا خو ل بەری د دەت و ب بەلاشی وان ئاخفتنا دبێژیت و ژ نەزانین و نەتێگەھشتنا وی یە).
دوھی نڤیسینگەھا مەلا بەختیار روونکرنەک بەلاڤکر و ب رەنگەکێ نەئاشکرا بەرسڤا داخویانێن جەعفەر شێخ موستەفای دا و گۆت: (دەربارەی ئێکگرتنا ھێزێن پێشمەرگەی، دیارە گەلەک ئاخفتن یێن ل سەر ھەین، لێ ژ بەر بارودوخێ نوکە، بتنێ دێ ھندێ بێژین: بەری کێشێن نوکە یێن ئێکەتیێ، مەکتەبا سیاسی ب ئامادەبوونا بەرێز جێگرێ سکرتێرێ گشتی و بەرپرسێن سەربازی یێن ئێکەتیێ ل مەکتەبا سیاسی بریار یا دای کو ب پرۆژە ل گەل پارتی دیموکراتی کوردستان ل سەر ئێکگرتنا ھێزێن پێشمەرگەی و چەندین بابەتێن دی ئێکەتی بکەڤیتە دانوستاندنان، د بریارێ دا و د کومبوونا مەکتەبا سیاسی دا ھاتیە گۆتن: ژبلی پرۆژێ ھەڤپشک، بریارێن ئێکلایەنە ناھێنە پەسەند کرن).
