ئێکگرتنا پێشمەرگەی پەیاما کوردستانێ یە بۆ ناڤخۆ و دەرڤە
شهاب ئاکرەیی
یەکخستنا هێزێن پێشمەرگەی نەک تەنێ رێکارەکێ سەربازی یان رێکخستنەڤەیا لیوا و فەوجان بوو، بەلکو روودانەک بوو کو سنوورێن دامەزراوە یا سەربازی دەرباز دکر بۆ واتا دەولەتێ ب خۆ.
ل 21ێ سێپتەمبەرا 2026ێ ب فەرمی ئێکگرتنا هەموو هێزێن پێشمەرگەی و رێکخستنەڤە یا وان ل ژێر سێبەرا وەزارەتا پێشمەرگەی ل ژێر پەیکەرەکێ ئێکگرتی یێ فەرماندەیی و کۆنتڕۆلێ هاتە ڕاگەهاندن.
پا ئەڤ چەندە چ دگەهینیت بۆ هەرێما کوردستانێ؟ و ئەو پەیام چییە کو بۆ ناڤخۆ و دەرڤە هەلگرتی؟
پەیاما ئێکێ بۆ ناڤخۆیا کوردستانێ ئەوە کو ئەو هێزا بهایەکێ گران دایی بۆ پاراستنا گەل و ئاخێ، فەرە ب شێوەیەکێ نیشتمانی بهێتە ئاڤاکرن ل سەرڤەی هەموو پابەندی یێن حزبی، و وەفادارییا وێ بۆ دامەزراوە، دەستوور و بەرژەوەندییا گشتی بێت.
ئەڤە نەک تەنێ مەلەفەکێ سەربازییە؛ بەلکو تاقیکرنەکە بۆ شیانا هەرێمێ کو ئەزموونا خۆ یا سیاسی بگوهۆریت بۆ دامەزراوەیێن جێگیر، سەرۆکێ حوكمەتا هەرێمێ داکۆکی کر کو قووناغا بهێت دڤێت گرنگیێ ب ئاڤاکرنا هێزەکا پیشەیی، ڕێکخستی و ئێکگرتی بدەت، دوور ل بکارئینانا پێشمەرگەی د ململانێ یێن ناڤخۆیی و حزبی دا.
سەرۆکێ هەرێمێ ژی دگۆت: ل ئەڤڕۆ پێڤە پێشمەرگە هێزەکا حزبی نینە، لێ هێزا هەمی کوردستانێیە.
پەیاما دویێ بۆ بەغدا ئەوە کو: پێشمەرگە، ب پێی ئاخڤتنا فەرمی یا هەرێمێ، بەشەکە ژ سیستەمێ بەرگریێ یێ ئیراقێ، و ئێکگرتنا وێ پەیوەندییا دگەل دامەزراوە یا سەربازی یا فیدرالی رۆنتر لێ دکەت ژ لایێ هەماهەنگی، فەرماندەیی و مافان، هەروەسا ئەڤ پرۆسەیە دگەل داخوازییان بوو بۆ دەستبەرکرنا ماف، مووچە و شایستەیێن دارایی ئێک ب ئێک وەک هەڤپشکان د سوپایێ ئیراقێ دا.
پەیاما سێێ بۆ جڤاکا نێڤدەولەتی ئەوە کو کوردستان ناخوازیت هێزەک هەبیت کو ل سەر قووناغ یان مەرجەکێ دیاریکری ڕاوەستابیت، بەلکو ژ بۆ دامەزراوەیەکا سەربازی یا سەردەمیانە کو شیانا پێشخستن، مەشقکرن و هەماهەنگیێ دگەل هەڤپشکان هەبیت، ڕێکارێن چاکسازیێ د سالێن بۆری دا ب پشتیەڤانییا هەڤپەیمانییا نێڤدەولەتی بەردەوام بوون، و حوكمەتا هەرێمێ داکۆکیێ دکەت کو قووناغا بهێت پێدڤی ب گەشەپێدانا شیان، چەکدارکرن و سیستەمێن بەرگرییا ئاسمانی هەیە.
بەلێ ئێکگرتنا ڕاستەقینە ب دەرکرنا بڕیارێ یان گوهۆرینا پەیکەران ب داوی ناهێت، ئاستەنگا مەزنتر ژ ئەڤرۆ پێدا دەستپێ دکەت: ئێکخستنا بڕیار، فەرمان، مەشق، پلەیا سەربازی، دیسپلین، و ماف و ئەرکان، وەک ل رێوڕەسمێن ئێکگرتنێ ب فەرمی ئاماژە پێ هاتیە دان.
و ل ڤێرە پەیاما کوورتر دیار دبێت: هێزا کوردستانێ ب ژمارەیا تفەنگان ناهێتە پێڤان، بەلکو ب شیانا وێ دهێتە پێڤان ل سەر دانانا وێ تفەنگێ ل ژێر دەسەڵاتا دامەزراوەیێ.
پێشمەرگەیێ ئێکگرتی نەک ب داویهاتنا رێگەهێ یە؛ بەلکو دەستپێکا تاقیکرنەکا نوو یا ئاڤاکرنا دامەزراوەیەکا سەربازی یا نیشتمانییە، کو هەرێمێ بپارێزێت، ڕێزێ ل دامەزراوەیێن دەولەتێ بگریت، و پەیامەکێ بۆ ناڤخۆ و دەرڤە بهنێریت کو ئێکگرتنا هێزێ دشێت بێتە پێنگاڤەک ژ پێنگاڤێن چەسپاندنا ئێکگرتنا بڕیارێ.