ئێکگرتوو: دڤێت چاکسازیەکا راستەقینە د ناڤبەرا حزب و حوکمەتێ دا بھێتەکرن
ئه‌ڤرۆ نيوز:
ئەندامەکێ مەکتەبا سیاسی یا ئێکگرتوویا ئیسلامی یا کوردستانێ دیارکر کو ئێکگرتوو پرۆژەکێ چاکسازیێ یێ پێشکەش کری و دبێژیت ئەوا ھەتا نوکە ھاتیەکرن پتر تەقشوفەکا ئابووری بوویە، یا دروست دڤێت چاکسازیەکا راستەقینە د ناڤبەرا حزب و حوکمەتێ دا بھێتەکرن، دڤێت نیەتەکا رژد ھەبیت بۆ چاکسازیێن ڕیشەیی.
ئەبو بەکر عەلی ئەندامێ مەکتەبا سیاسی یا ئێکگرتوویا ئیسلامی یا کوردستانێ بۆ رۆژناما ئەڤرۆ گۆت” ھەکە پشکەکا ڤان چاکسازیێن حوکمەت دبێژیت بکەڤنە دبیاڤێ بجھئینانێ دا، دێ داھاتەکێ باش بۆ حوکمەتێ ڤەگەریت، ھەکە باوەری بۆ خەلکێ مە دروست بوو کو شەفافیەت د خالێن سنوری و داھاتێ پەترۆل و ھەر تشتەکی دی دا ھەیە، ھەکە کێشێن سیاسی ژی بەر ب چارەبوونێ چوون، پتر خەلک دێ ل گەل حزب و حوکمەتێ بیت و دێ پتر باوەری بۆ پەیدا بیت”.
ھەمبەر پێکئینانا لژنەکێ د کۆمبوونا سەرۆک بارزانی ل گەل لایەنێن سیاسی ژی، ئەبو بەکر کاروانی گۆت”دێ مینیت ل دەرئەنجامێ وێ لژنا ھاتیە پێکئینان و ھەتا چ رادە دێ شێت ھەموو ئالیێن سیاسی نێزیکی ھەڤدو کەت و تایبەت ڤێ قوناغا ھەستیار یا دەڤەر تێدا دەرباز دبیت و ئەم ب ھیڤی نە دێ ئەنجامەکێ باش و سەرکەفتیانە ھەبیت، خورتکرن و کاراکرنا پەرلەمانی دەستپێکرنا خوەشکرنا کاودانێن ھەرێمێ نە بەر باش بوونێ و ئەڤە پێنگاڤێن بەر ب تەوافوق بوونێ نە و دڤێت ئەڤە پێنگاڤێن ئێکێ بن، ھەموو بزاڤ بھێنەکرن دێ چاوان پێگەھێ خوە وەک کورد ل دەڤەرێ بھێز ئێخین و دێ چاوان کار کەین بەر ب سەربخوەیێ چین”.
