ئێکەتیا ئورۆپا دێ ل دۆر رۆلێ خراب یێ ئیرانێ ل ئورۆپا کۆم بیت
ئه‌ڤرۆ نيوز:
چاڤدێرەکێ سیاسی یێ کورد دیار دکەت کو دانیمارک و سوید و چەندین وەلاتێن دی یێن ئورۆپا بەلگەیێن تەمام ل دۆر تیرۆرکرنا چەندین کەسایەتیێن ئۆپۆزسیۆنێ ب دەستێ ھێزێن ئیرانێ ل ئورۆپا کۆمکرینە و ھەروەسا ڤێ دووماھیێ چەندین کەسێن سەر ب دەزگەھێن ھەوالگیریا ئیرانێ دخواستن سەرۆکێ پارتەکا عەرەبی ل دانیمارکێ تیرۆر بکەن لێ پۆلیسێن دانیمارکێ ئەو کەس دەستەسەر کرینە.
عەلی فەرھادی چاڤدێرێ سیاسی یێ کورد ل وەلاتێ دانیمارک بۆ رۆژناما ئەڤرۆ دیار کر کو بەری چەند رۆژان پۆلیسێن دانیمارک شیان تیمەکا ئیرانی دەستەسەر بکەن کو وان بەرنامە بۆ تیرۆرکرنا حەبیب جەبری سەرۆکێ بزاڤا ئازادیا ئە‌حوازێ دانابوون، لێ بەری کو بشێن ڤێ کریارێ ئەنجام بدەن ھاتینە دەستەسەر کرن و ژ بەر ھندێ ژی وەلاتێ دانیمارک بالیۆزێ خوە ژ تەھرانێ ڤەکێشایە و دخوازیت ھەموو پەیوەندیێن خوە یێن سیاسی ل گەل ئیرانێ بدەتە راگرتن و گۆت: (بەری نھا ژی ل فرەنسا و سوید ئیرانێ بزاڤا تیرۆرکرنا ھندەک کەسایەتیێن ئۆپۆزسیۆنێ کربوون لێ ب ھاریکاریا دەزگەھێ ھەوالگیریا ئەمریکا وان وەلاتان شیان رێگریێ ل ڤان کریاران بکەن).
ناڤھاتی د بەردەوامیا ئاخڤتنا خوە دا ئەو یەک ژی دیار کر کو پشتی کۆمارا ئیسلامی یا ئیرانێ ھاتیە سەر کار ھەتا نھا ب دەھان سەرکردێن ئۆپۆزسیۆنێ ل ئورۆپا ھاتینە تیرۆرکرن کو نموونا بەرچاڤ ژی شەھیدکرنا د. عەبدولرەحمان قاسملو سکرتێرێ گشتی یێ بەرێ یێ پارتی دیموکراتی کوردستان/ ئیران و شەھید د. سادق شەرەفکەندی و گەلەک سەرکردێن دی یێن ئۆپۆزسیۆنا ئیرانێ کو مخابن ژ بەر بەرژەوەندیێن ئابووری یێن ئورۆپا ل گەل ئیرانێ وەکو پێدڤی دووڤچوونا وان دۆسیان نەھاتە کرن، لێ نھا ئەمریکا دەست ب سزادانا ئیرانی یا کری و وەلاتێن ئورۆپا ژی ئێدی نەشێن وەکو جاران ل گەل ئیرانێ بەردەوام بن و ئاشکراکرنا ڤان بابەتان نھا دشێت وەکو کارتەکا بھێز ل دژی سیستەمێ ئیرانێ بھێتە بکارئینان و گۆت: (ھێڤیدارم بابەتێ شەھیدکرنا ھەر دو سەرکردێن کورد ژی جارەکا دی بکەڤیتە رۆژەڤا ئورۆپا، چونکو ل گۆر پێزانینێن ل بەر دەستێ من ھەر ئێک ژ وەلاتێن دانیمارک، سوید، نەرویج و فرەنسا داخواز دکەن کو ئێکەتیا ئورۆپا ل دۆر کریارێن ئیرانێ و بزاڤێن تیرۆرکرنا سەرکردێن پارتێن ئۆپۆزسیۆنا ئیرانێ کۆمبوونەکێ بکەن و بریارێن توند ل دژی ئیرانێ بدەن).
چاڤدێرێ سیاسی ئەو یەک ژی دیار کر کو ئەمریکا ب ھەموو رەنگەکێ دەستخوەشیێ ل ڤان بزاڤێن وەلاتێن ئورۆپا دکەت و ئەندامەکێ پەرلەمانێ ئورۆپا دوھی بۆ من دیار کر کو وەزیرێ دەرڤە یێ ئەمریکا ل گەل ھندەک سەرکردێن ئورۆپا ئاخڤیە و بۆ وان دیار کریە کو ل دژی ئیرانێ ل گەل ئەمریکا ببنە ئێک دا بشێن دەستێ ئیرانێ ل رۆژھەلاتا ناڤین و دەڤەرێن دی یێن جیھانێ کورت بکەن، چونکو ھەتا سنۆرەک بۆ رژێما نھا یا ئیرانێ نەھێتە دان دێ ئیران ھەر دەم بزاڤا دروستکرنا ئالۆزیان ل جیھانێ کەت.
چاڤدێرێ سیاسی کو خەلکێ رۆژھەلاتێ کوردستانێ یە ئەو یەک ژی نەڤەشارت کو رەنگە دیسان وەلاتێن ئورۆپا بخوازن ئیرانێ تەنگاڤ بکەن و ل ھەمبەر وەرگرتنا ھندەک بەرژەوەندیێن ئابووری خوە بێدەنگ بکەن، لێ ڤێجارێ ئەمریکا بێ ھەلویست نابیت و رەنگە وەلاتێن ئورۆپا تەنگاڤ کەت، ھەکە ھەلویستێ ئورۆپا ل ھەمبەر ڤان کریارێن ئیرانێ جدی بیت ئەز باوەرم دێ بۆ کوردان و بەرھنگاریا ئیرانێ ب گشتی یا باش بیت.
