ئێکەتیا ئورۆپا ٢٢ ملیۆن یۆرۆیان ل ھەرێما کوردستانێ دێ مەزێخیت
ئەڤرۆ نیوز:
نوونەرێ حوکمەتا ھەرێما کوردستانێ ل ئێکەتیا ئورۆپا دیار کر، د چارچوڤێ کۆمبوونا سالانە یا وەلاتێن ھاریکاریان پێشکێش دکەن یێن ئێکەتیا ئورۆپا دا، بڕیار ھاتیەدان ئێکەتیا ئورۆپا ٢٢ ملیۆن یۆرۆیان ل ھەرێما کوردستانێ ب مەزێخیت.
دلاوەر ئاژگەیی، نوونەرێ حوکمەتا ھەرێما کوردستانێ ل ئێکەتیا ئورۆپا خویا کر، د کۆمبوونا سالانە یا وەلاتێن ھاریکاریان پێشکێش دکەن یێن ئێکەتیا ئورۆپا دا کو ل برۆکسل و ب بەرھەڤبوونا نوونەریا ھەرێما کوردستانێ ھاتبوو ئەنجامدان، بڕیار ھاتەدان وەلاتێن ھاریکاریان پێشکێش دکەن ئێن ئورۆپا د ناڤەڕاستا ئەڤ سالە ھەتا ناڤەڕاستا سالا بھێت ٢٢ ملیۆن یۆرۆیان ل ھەرێما کوردستانێ بۆ ئاوارە و پەنابەران و ھەرێما کوردستانێ ب رێیا پرۆژێن خوە ب مەزێخن.
ناڤھاتی بۆ تۆڕا میدیایی یا رووداو گۆت: “د کۆمبوونێ دا بەحسێ وان وەلاتان ھاتەکرن یێن کەفتینە بن کارتێکرنا قەیران و ئالۆزیان، ژ وان ژی وەلاتێن سووریا و عیراقێ و ھەرێما کوردستانێ ژی وەکو نموونە ئینان”.
ئاژگەیی ئاماژە ب وێ چەندێ ژی کر کو د کۆمبوونێ دا سۆپاسیا شێوازێ کارکرنا حوکمەتا ھەرێما کوردستانێ ھاتەکرن، دیسا بەحسێ ناڤەندا ھەماھەنگیا قەیرانان یا سەر ب وەزارەتا ناڤخوە یا ھەرێمێ ژی ھاتەکرن کو ھەڤکاریا وان کرینە و د شیان دایە مفا ژ شێوێ کارکرنا وان بھێتە وەرگرتن ل وەلاتێن وەکو: لوبنان و ئوردن و ئەو دەڤەرێن ئێکەتیا ئورۆپا پرۆژان لێ ئەنجام ددەت.