ئێکەتیا مامۆستایان: ب ڤی رەنگی بیت سوبەھی دەوام دەسپێناکەت
ئەڤرۆ نیوز:
ھژمارەکا ماموستایان ل پارێزگەھا دھۆکێ وەکو ھەموو دەڤەرێن دی یێن کوردستانێ دوھی رۆژا 25/9/2016ێ خرڤەبوونەکا نەرازیبوونێ ل دۆر مووچێ مامۆستایان ل بەر دەرگەھێ لقێ دھۆکێ یێ ئێکەتیا مامۆستایێن کوردستانێ ئەنجام دا و ژ ئالیەکێ دی ڤە د راگەھاندنەکێ دا وەزارەتا پەروەردا حوکمەتا ھەرێما کوردستانێ دیار کر کو دەرگەھێ قوتابخانان بۆ سالا نوو یا خواندنێ 2016 – 2017 دێ سوبەھی رۆژا 27/9/2016ێ ل ھەرێما کوردستانێ ھێتە ڤەکرن.
وەھبی یونس تێلی، سەرۆکێ لقێ دھۆک یێ ئێکەتیا مامۆستایێن کوردستانێ بەیانناما ئێکەتیا ناڤھاتی خواند کو دانەک ب دەست رۆژناما ئەڤرۆ کەفت و تێدا ھاتیە کو ھەر ژ دەستپێکا قەیرانێ کو دکەڤیتە 1/1/2014 و ھەتا نوکە وەکو نوونەرێن مامۆستایان وان چەندین دەرگەە قوتاینە و ھەتا نوونەرێن مامۆستایان ل سەر ئاستێ جیھانێ و یونسکۆ و دووماھی کۆمبوونا ئەنجوومەنێ تەنفیزی یێ ئێکەتیا مامۆستایێن کوردستانێ 11/8/2016 بوویە و بڕیار ھاتبوودان کو پلانەک بھێتەدارێتن بۆ ئەنجامدانا پتر فشارا ھەتا کو داخوازیێن وان بھێنە بجھئینان.
د ھەمان بەیاننامە دا ھاتیە کو پێنگاڤا ئێکێ ب رێیا یاداشتەکێ بوو بۆ ھەموو لایەنێن پەیوەندار، پێنگاڤا دویێ خرڤەبوونا مامۆستایان ل سەرانسەری لقێن مامۆستایان، پێنگاڤا سێ یێ ژی زنجیرا پێنگاڤێن مەدەنی یە و ھیڤی خوازین بڕیار ل سەر خواست و داخوازیێن مامۆستایانن بھێتەکرن.
سەرۆکێ لقێ دھۆک یێ ئێکەتیا مامۆستایێن کوردستانێ د بەیانناما ناڤبری دا دیار کر کو کاودانێن ھەرێما کوردستانێ گەھشتینە ئاستەکی دەستێ ھەر کەسەکی ل سەر دلێ وی یە و ئەڤە ئێکە ژ ئەگەرێن ڤێ قەیرانا ھندە گران، لەزکرن و پێداچوون د پاشکەفتنا مووچەی یا نە د جھێ خوە دا بھێتەکرن و مووچە د دەمێ خوە دا بھێتەدان و ھەکە ئەڤە نەھێتەکرن چاڤەرێی برێڤەچوونا پەروەردێ و خواندنا بلند نەبن، لەزکرن د چاکسازیان دا پشکەکا مەزنە ژ ئێش و ئازارێن مامۆستایان و ھەموو فەرمانبەرێن کوردستانێ، ھیڤی خوازین ب زووترین دەم بەرسڤا مە بھێتەدان و ئەگەر نە دێ بەردەوام بین ل سەر گڤاشتنێن مەدەنیانە و ئەڤ پێنگاڤە بۆ بەرژوەندیا چو لایەنەکێ سیاسی نینە و بتنێ مەرەما مە خوشکرنا ژین و ژیارا مامۆستا و فەرمانبەرانە و باشتر ب رێڤەچوونا پرۆسا پەروەردی یە.
ھەژی گۆتنێ یە کو دوھی رۆژا 25/9/2016ێ وەزارەتا پەروەردا حوکمەتا ھەرێما کوردستانێ راگەھاندنەک بەلاڤکر و تێدا پیرۆزباھیا ھەموو ماموستا و قوتابیان ب ھەلکەفتا سالا نوو یا خواندنێ 2016 – 2017 کریە و داخوازکریە سالا نوو یا خواندنێ ب سەرکەفتیانە بھێتە دەست پێ کرن و دیار کریە 27/9/2016ێ دەرگەھێن قوتابخانانان بۆ سالا نوو یا خواندنێ 2016 – 2017 دێ ل سەرانسەری ھەرێما کوردستانێ ھێنە ڤەکرن.