ئێکەتی: ئەنجامدانا ھەلبژارتنان کارەکێ ب زحمەتە
ئەڤرۆ نيوز:
ئەندامەکێ سەرکرداتیا ئێکەتی یا نشتیمانی یا کوردستانێ ئاشکراکر کو ھەموو پارتێن کوردستانێ دخازن ھەردو ھەلبژارتن ل ئێک رۆژدا بھێنەکرن، چونکو بارگرانیەکا مەزنە بۆ حوکمەتا ھەرێما کوردستانێ دو ھەلبژارتنان د سالەکێ دا بھێنە کرن، لێ چ ھێزێن کوردی دبەرھەڤ نین خوە بکەن خودانێن ڤێ ھزرێ.
ھەرێم کەمال ئاغا ئەندامێ سەرکرداتیا ئێکەتیا نشتیمانی یا کوردستانێ بۆ رۆژناما ئەڤرۆ گۆت: ئەنجامدانا دو ھەلبژارتنان دئێک سال دا بارەکێ گرانە بۆ حوکمەتا ھەرێما کوردستانێ، تایبەت ڤێ قەیرانا ئابووری دا ئەو ھەرێم تێدا دەرباز دبیت.
ھەرێمی گۆت: دڤێ قەیرانا دارایی دا ئەنجامدانا دو ھەلبژارتنان ماوێ سێ ھەیڤان دا کارەکێ بزحمەتە بۆ حوکمەتا ھەرێما کوردستانێ و بەری نوکە ژی گەنگەشە ل سەر ھاتیەکرن، چونکو بارگرانیە بۆ حوکمەتێ باشتر ئەو بۆ ھەر دو ھەلبژارتنێن پەرلەمانێ کوردستانێ و جڤاتێن پارێزگەھا ئێک رۆژ دا بھێنەکرن، یا ھەلبژارتنێن پەرلەمانی 30/9 بچنە ھەیڤا 12 یان بەرۆڤاژی جڤاتێن پارێزگەھا بھێنە 30ی ئەیلولێ.
ھەرێم کەمال ئاغا ئەو ژی گۆت: پارتی و ئێکەتی ل کومبوونێن مەکتەبێن سیاسی گەنگەشە ل سەر ھەلبژارتنان کرینە، کوھەلبژاترنێن پەرلەمان و ژڤانێ جڤاتێن پارێزگەھان دئێک دەمدا بھێنە کرن، ھەموو ئالیێن سیاسی ل گەل ڤێ بوچوونێ نە لێ چ پارتێن کوردستانێ نە دبەرھەڤن خوە بکەنە خودانێن ڤێ ھزر یان ئەڤ جورعەتە نەکر ڤێ چەندێ بکەت.
ھەرێم ئەو ژی گۆت: بھیڤی نە ل ھەلبژارتنێن ئەڤ جارە یێن پەرلەمانێ کوردستانێ دێ ئێکەتی نشتیمانی کوردستان کورسیکێن زێدەتر ژ خولا بوری یا پەرلەمانی ب دەست خوە ڤە ئینت.