ئەردۆگان دخوازیت تورکمان ل رۆژئاڤایێ کوردستانێ بھێنە بجھکرن
ئه‌ڤرۆ:
لەشکرێ تورکیا ل سنۆرێ رۆژئاڤایێ کوردستانێ ھێزا سەربازی کۆم دکەت و دخوازیت ھەموو سنورێ باکورێ کوردستانێ ل گەل رۆژئاڤا ب تانک و تۆپێن گران دۆرپێچ بکەت و سەرۆک کۆمارێ تورکیا ژی دبێژیت دڤێت تورکمان ل رۆژئاڤایێ کوردستانێ بھێنە بجیە کرن و بەرپرسەکی PKK ژی راگەھاند کو دەستێوەردانەکا سەربازی یا تورکیا و ئینانا تورکمانان بۆ رۆژئاڤا سەدەمێ مان و نەمانێیە.
بەری دەستپێکرنا ھەلبژارتنێن تورکیا سەرۆک کۆمار و سەرۆک وەزیران و رایەدارێن پارتا داد و گەشەپێدانێ (ئاکپارتی) ب داخۆیانی و کریارێن خوە دخوازن رەوشا تورکیا و باکور و رۆژئاڤایێ کوردستانێ ئالۆز بکەن و ب ڤی رەنگی دەنگێ نەتەوەپەرەستێن تورکیا بۆ خوە کۆم بکەن و ل ھەمبەر دا سازیێن سڤیل و پارتێن سیاسی یێن کورد و تورک دخوازن رایەدارێن تورکیا ئاشتی و پرسا کوردی نەکەنە قوربانا ھەلبژارتنان.
ئاسلان ئەرکان رۆژنامەڤانێ تورک ل باژێرێ عەنتاب یێ تورکیا د داخۆیانیەکی دا بۆ رۆژناما ئەڤرۆ راگەھاند کو پشتی کۆمبوونا شاندێ تورکیا و یا سعوودیێ دەولەتا تورکیا ھێزێن خوە یێن سەربازی ل سەر سنۆرێ رۆژئاڤایێ کوردستانێ کۆم دکەت و گۆت: (رەجەب تەیب ئەردۆگان سەرۆک کۆمارێ تورکیا بۆ دەستھەلاتەکا تاکەکەسی ھەموو پلان و پرۆژێن دژوار گرتیە بەر خوە و د ڤێ چارچۆڤێ دا بۆ بلندکرنا دەنگێ (ئاکپارتی) دخوازیت سۆپایێ تورکیا دەربازێ ئاخا رۆژئاڤا و سووریێ بکەت و ب ڤی رەنگی دەنگێ نەتەوەپەرەستان جارەکا دی بۆ خوە کۆم بکەت، لێ ھەموو پارتێن سیاسی و سازیێن سڤیل ژ ڤێ پلانا ئەردۆگانی ھشیارن و دێ د ناڤا دو رۆژان دا ب سەدان سازیێن سڤیل و وەلاتیێن باکورێ کوردستانێ و پارتێن سیاسی ل سەر سنۆرێ رۆژئاڤا کۆم ببن و نەھێلن کو سەربازێن تورکیا دەربازێ ئاخا رۆژئاڤا و سووریێ ببن).
ل ئالیێ دی پشتی کو سەرۆک کۆمارێ تورکیا د داخۆیانیەکی دا راگەھاند دێ گوھۆرینێن مەزن ل سووریێ دروست ببن و نھینیێن کۆمبوونا وی ل گەل تورکمانان ئاشکرا بوو دژواریا پلانا ئەردۆگانی ل دژی رۆژئاڤا ژی ب ھەموو مەترسیێن خوە ڤە دەرکەڤتنە مەیدانێ و ئەردۆگان بۆ تورکمانان دیار کریە بلا خوە بەرھەڤ بکەن دا کو دەمێ ھێرشێن وان و سعوودیێ بۆ سەر سووریێ دا دەستپێکرن راستەوخوە وەلاتیێن تورکمان یێن ل سووریێ و تورکیا دەربازی رۆژئاڤا ببن و ھێزا خوە یا چەکدار ل وێ دەڤەرێ دروست بکەن و دەستھەلاتا کوردان تێک ببەن.
د ڤێ دەربارێ دا سەلاحەدین دەمیرتاش ھەڤسەرۆکێ پارتا دیمۆکراسیا گەلان (HDP) راگەھاند کو ئەو دێ پلانا ئەردۆگان یا ل دژی گەلێ کورد ژناڤ ببەن و بۆ ئەردۆگانی گۆت: (نە د شیانا تە و پارتا تە و پەیوەندیێن تە یێن کرێت داینە تو رۆژئاڤایێ وەلاتێ مە داگیر بکەی و تو نەشێی براتیا گەلێن رۆژئاڤا و تورکیا ژناڤ ببەی ژ بەر ڤێ چەندێ سەربازێن ل سەر سنۆری ڤەکێشە ھەکە وەسا نەبیت بەرپرسێ ھەر کریارەکی نەخواستی و ھەر شەرەکی تو و ھەڤالێن تەنە).
ھەروەسا بەرپرسەکی کۆما جڤاکێن کوردستانێ ژی راگەھاند کو ئەردۆگان دەست ژ قۆناغا ئاشتیێ بەردایە و نھا بۆ دەستپێکرنا شەری ھەر بزاڤەکێ دکەت و ئاخڤتنا وی یا کو تورکمان دێ ل رۆژئاڤا بھێنە بجە کرن ژی دھێتە واتەیا پلانەکا مەترسی یا دژوار و گۆت: (بۆ مە و ھەموو گەلێ کورد رۆژئاڤا ھێلا سۆرە و ھێلا مان و نەمانێیە و ھەر پێنگاڤەکا تورکیا ل دژی رۆژئاڤا دێ تورکیا بەر ب شەرەکی مەزن ڤە ببەت کو ئەو یەک د بەرژەوەندا کەسێ دا نینە).
ل ئالیێ دی بەرپرسەکی پارتا کۆماریا گەل ژی راگەھاند کو ئەردۆگانی دڤێت بەری ھەلبژارتنان سەرباز دەربازی سووریێ ببن و دڤێت خەلکێ مە ل ھەمبەر سیاسەتا دوور ژ راستیێ یا ئەردۆگانی بێدەنگ نەمینن.
