ئەرد و خانی ل سەر ناڤێن ئێزدیان ل شنگالێ دێ هێنە تاپۆكرن
لەزگین جوقی
12 كۆمەلگەهـ و پتر ژ 80 گۆندێن سەر ب شنگال و بەعاج ڤە، هەر ژ سالا 1975ێ هەتا نوكە ل سەر ناڤێ خەلكێ شنگالێ نەهاتینە تاپۆكرن، ب تایبەتی ژی ل سەر ناڤێن ئێزدیان خانی نە دهاتنە تاپۆكرن، ئێزدی خەلكێ رەسەن یێ شنگالێ نە و حكومەتێن ئیراقێ ب مەرەما گوهۆرینا دیموگرافیا شنگال و تەعریبێ خانی ل سەر ناڤێ ئێزدیان تاپۆنەكرینە».
باپیر خدر حەجی، سەرۆكێ باژێرڤانیا شنگال بۆ ئەڤرۆ دیار كر، بریار هاتیە دان هەموو دەڤەرێن ئێزدیان ل شنگال ل سەر ناڤێ خەلكێ ئێزدی بهێنە تاپۆكرن، ب تایبەتی ژی خانی ل شنگال نە تاپوكرینە و دێ هەمی ل سەر ناڤێ خودانان هێنە تاپۆكرن».
ئاشكرا كر، هژمارەكا مەزن خانی ل شنگال هەنە، هێشتا نەهاتینە تاپۆكرن، ب مەرەما تەعریبێ و گوهۆرینا دیموگرافیا شنگال خانی ل سەر ناڤێ ئێزدیان نەدهاتنە تاپۆكرن ژلایێ حكومەتێن ئیراقێ ڤە، ئەڤ ئاریشە گەلەك یا كەڤنە و هەتا 12 كۆمەلگەهێن ئاكنجیبوونێ ل شنگال هەنە و هەمی نە د تاپۆكرینە، نوكە پارێزگارێ نەینەوا بریار دایە هەموو خانیان بۆ خەلكی تاپۆ بكەن».
باپیر خدر حەجی گۆت: نە تاپۆكرنا خانیان ل شنگال بوویە ئاریشە بۆ وەلاتیان، ژبەر كو خەلك نەشێن كرین و فرۆتنی ب خانیێن خۆ بكەن، گەلەك ئاریشە بۆ خەلكی ژ بەر نەتاپۆكرنا خانیان چێبووینە، ئەم هیڤیدارێن هەموو خانی ل سەر ناڤێ خەلكێ شنگال بهێنە تاپۆكرن».
عەبدولقادر دەخیل پارێزگارێ نەینەوا ڕاگەهاند، ل سنورێ قەزا شنگالێ چ ئەرد ب ناڤێ خەلكێ شنگال نەهاتینە تاپۆكرن، نوكە ئەم شیان ئێكەم سەنەدێ ب ناڤێ هاوڵاتییەكی ئێزدی دروست بكەین دەست ب تاپۆكرنا خانیان ل شنگال هاتە كرن».
