لۆمەکرن.. ژەهرەکا ڤەشارتی یە دناڤ پەیوەندیێن جڤاکی دا
موسا خالد
د جڤاکێ دا، دیاردەیەکا نەخۆش هەیە بناڤێ “لۆمەکرن” ئەڤ دیاردەیە ب بێدەنگی و هێدی هێدی دچیتە د ناڤ پەیوەندیێن مە یێن ڕۆژانە دا و گیانێ ڕێزگرتنێ و نێزیکبوونێ دکوژیت. مخابن، لۆمەکرن بوویە ڕەفتارەکا بەردەوام بۆ گۆتن و ڕەخنەگرتنێ ل سەر گەلەک تشتان: ژ شێوازێ ئاخفتنێ و ئاخفتنا دروست یان شاش، جۆرێ جلکان، ڕێڤەچوونێ، هەتا دگەهیتە هەلبژارتن و بڕیارێن ژیانێ یێن تایبەت.
چ مفا د ڤێ ڕەفتارێ دا هەیە؟ د ڕاستی دا، چ مفا تێدا نینە، لۆمەکرن دبیتە ئەگەڕێ دلگرانکرنێ، دوورکەفتنا مرۆڤان ژ ئێکودو و دروستکرنا نەئارامیێ د جڤاکی دا. دەمێ کەسەک بەردەوام د بن گرانییا لۆمەیێن خەلکی دا بیت، ئازادیا هەلبژارتنێ و ئارامیا دەروونی ژ دەست ددەت. ل جهێ کو جڤاک ببيتە جهەک بۆ ئاڤاکرن و پشتەڤانیکرنا ئێکودو، دبیتە دادگەهەکا نەدیار کو تێدا خەلک بەردەوام ڕۆلێ دادوەری دگێڕن و سزایێن دەروونی ل سەر ئێکودو دسەپێنن.
ئەڤ لۆمەکرنا بەردەوام، شیانێن کەسایەتیێ دکوژیت و شیانێن داهێنانێ د ناڤ گەنجان دا بێهێز دکەت. گەلەک کەس ژ ترسا گۆتنا خەلکی و لۆمەیێن جڤاکی، دەست ژ خەونێن خۆ بەرددەن و دترسن پێنگاڤێن نوو ب هاڤێژن. مرۆڤ ناکەڤیتە د چ قۆناغەکا نوو یا ژیانێ دا بێی کو ڕووبەڕووی لۆمە و گۆتنێن دەورۆبەرێن خۆ ببیت. ئەڤە ژی وەک ژەهرەکا ڤەشارتی یە کو شیان و بەهرەیێن مە هەمیان لاواز دکەت و بەرهەمداریێ کێم دکەت.
ل جهێ کو ئەم بەردەوام تبلێن خۆ درێژ کەینە کێماسیێن ئێکودو، دەم هات بگەهینە وێ باوەریێ کو جیاوازی جوانییا ژیانێ یە. ڕێزگرتن ل ئازادییا تاکەکەسی د هەموو بواران دا، نیشانا پێگەهشتن و ڕەوشەنبیرییا جڤاکی یە. بلا ل شوونا لۆمەیێ و شکاندنا دلان، پەیڤێن پڕ ژ هیڤی و پشتەڤانیێ ل سەر لێڤێن مە بن؛ چونکە لۆمەکرن چ جاران نەبوویە ڕێیا ئاڤاکرن و چاکسازیێ، بەلکو ب تنێ دیوارێن دوورکەفتنێ بلندتر دکەت.
وەرەن دا ئەم هەموو پێکڤە ڤێ گۆڕانکاریێ ژ خۆ دەستپێبکەین و دەستێ ئێکودو بگرین بۆ ئاڤاکرنا کلتورەکێ پڕ ژ ڕێز و خەمخۆریێ. ب تنێ ب ڤێ چەندێ دێ شێین جڤاکەکێ ساخلەم و هزرڤەکری ئاڤا کەین کو تێدا ئازادییا تاکەکەسی دهێتە پاراستن و کەسێن بەهرەمەند دبنە خودان هێز و هەلوێست.
