ئەشواق جاف: عەبادی ژ پرسیارێن پەرلەمانتاران ڕەڤی
ئەڤرۆ نيوز:
ئەندامەکا جڤاتا نوونەرێن عیراقێ ژ فڕاکسیۆنا پارتی ئاماژە ب بەرسڤێن سەرۆک وەزیرێن عیراقێ ل روونشتنا جڤاتا نوونەران دا وگۆت، عەبادی خوە ژ پرسیارێن پەرلەمانتاران ڤەدزی.
ئەشواق جاف ئەنداما جڤاتا نوونەرێن عیراقێ ژ فڕاکسیۆنا پارتی زێدەتر گۆت” مە چەندین پرسیار بۆ حەیدەر عەبادی سەرۆک وەزیرێن عیراقێ
بەرھەڤکربوون و ژێ کرن کو پرسیارا من یا ئێکێ بوو ومن گۆتێ ھەکە پێشمەرگە پشکداریێ د ئازادکرنا مووسلێ دا بکەت، بۆچی ھوون بودجەی ناھنێرن؟ دیسا پرسیارا دویێ یا نوونەرێن کورد ژ عەبادی ئەوبوو ژی ل سەر پرسا ڕێککەفتنا پەترۆلێ بوو، پرسیارا سیێ ژی ل سەر پرسا پارێ گەنمێ جوتیاران بوو، پرسیارا چارێ، ل سەر پەیوەندیا ھەرێما کوردستانێ و بەغدا بوو و مە گۆتێ پەنایێ نەبە بۆ داخۆیانیێن رۆژنامەڤانی، بەلکو د کۆمبوونێن فەرمی دا کێشان بەحس بکە”.
ئەشواقێ زێدەتر گۆت” حەیدەر عەبادی بەرسڤا چو پرسیاران نەدا، بەلکو ب شێوەکێ گشتی دئاخڤت، دھەمان دەمدا من دو جاران ئاخڤتنا وی بڕی و من گۆتێ پێدڤیە تو ب دێکیۆمێنت بەرسڤێ بدەی، بەلێ وی بەرسڤا من ل وێرێ ژی نەدا”.
ھەر د وێ روونشتنا جڤاتا نوونەران، عەبادی داخواز ژ پەرلەمانتاران کر کو دەستھەلاتێن زێدەتر ب وی بدەن.
دەزگەھێن راگەھاندنێ یێن عیراقی بەلاڤکر کو عەبادی ئەڤ داخوازیە کر بۆ وێ چەندێ ھەتاکو بشێت گوھۆڕینان د جڤاتا وەزیران دا بکەت و کابینەکا وزاری یا نوو یا پیشەیی و تایبەتمەند دروست بکەت.
حەیدەر عەبادی د گۆتارا خوەدا گوت ژی” چاکسازی دناڤ جڤاتا وەزیران دا دژی چو کەس و لایەنەکی نینن، بەلکو بۆ بەردەوامیێ یە ل سەر چاکسازیێ و بۆ ڤێ چەندێ ژی من پێدڤی ب تیمەکا ئیچک دەنگ ھەیە”.
سەرۆک وەزیرێن عیراقێ داخواز ژ حزب و لایەنێن سیاسی یێن عیراقی کر، ژبۆ بەرژەوەندیا بلند یا وەلاتی، دەست ژ مافیان بەردەن.
