ئەشواق جاف مەترسیەکێ ئاشکەرا دکەت
ئەڤرۆ نیوز:
پەرلەمانتارەکا پارتی ل پەرلەمانێ عیراقێ بەرسڤا دو پەرلەمانتارێن کۆمەلا ئیسلامی و بزاڤا و گۆڕان ل پەرلەمانێ عیراقێ ددەت و دبێژیت، ھەکە ئەو راست دبێژن کو بەغدا بودجێ پێشمەرگەی ھنارتیە، بلا بێژن چەندە، ھەروەسا دیارکر، بەحسکرنا ئاریشێن ھەرێما کوردستانێ بۆ بەغدا دێ زیانێ ب خەلکێ ھەرێما کوردستانێ گەھینیت.
ئەشواق جاف، ئەنداما پەرلەمانێ عیراقی ژ فراکسیۆنا پارتی دیموکراتی کوردستان بۆ رۆژناما ئەڤرۆ گۆت” ئەوێن بەحسێ چوونا شاندێ ھەرێما کوردستانێ دکەن وەکی شاندەکێ حزبی، تنێ بۆ موزایەداتێن ھەلبژارتنانە و ئەو شاندێ بڕیارە ژ حوکمەتا ھەرێما کوردستانێ سەرەدانا بەغدا بکەت، نوونەرێ خەلکێ ھەرێما کوردستانێ یە و مەکتەبێن سیاسی یێن ھەموو حزبان یێن ڕێککەفتین ئاریشە ب ڕێیا دانوستاندنان بھێنە چارەسەرکرن، لەوڕا داخویانیێن ھژمارەکا پەرلەمانتارێن کورد ل پەرلەمانێ عیراقێ د بەرژەوەندیا گەلێ کوردستانێ دا نینە و دێ زیانێ ب ھەرێما کوردستانێ گەھینن، ھەر ئاریشەکا ھەرێما کوردستانێ کەسەک ببەت بۆ پشت چیایێ حەمرین کو سنورێ ھەرێما کوردستانێ یە ل گەل بەغدا، ئەڤە ب پلا ئیکێ زیانە بۆ وەلاتیێن ھەرێما کوردستانێ، ھەکە شاندێ ھەرێما کوردستانێ سەرەدانا بەغدا ژی بکەت، تنێ بۆ دو مەرەمانە، یا ئێکێ ھەماھەنگیا ھەرێما کوردستانێ و عیراقێ بۆ بەرھنگاربوونا شەڕێ تیرۆرستێن داعشێ و چاوانیا بەرھەڤکرنا پڕۆژە بودجێ گشتیێ عیراقێ یە یێ سالا 2016ێ نەکو چو ئاریشێن حزبی.
ئەڤێ پەرلەمانتارا پارتی ل پەرلەمانێ عیراقێ ل دۆر داخویانیا نوونەرێن کۆمەلا ئیسلامی و بزاڤا گۆڕان ل دۆر ھنارتنا بودجێ پێشمەرگەی، گوت”چو راستی بۆ ئاخڤتنێن وان ھەردو پەرلەمانتارێن کورد یێن لیژنا دارایی ل پەرلەمانێ عیراقێ نینە، چونکی د پڕۆژە بودجێ سالا 2015ێ دا ب چو ڕەنگەکی بەحسێ ھنارتنا بودجێ پێشمەرگەی نەکریە ،ژ بەر کو ل سالا بۆری ئەز یەکەم پەرلەمانتاربووم من رەخنە ھەبوو ل سەر پرسا بۆدجێ پێشمەرگەی، راستە د بەندەکا بودجەی دا ھاتیە کو بودجە بۆ ھێزا پێشمەرگەی بھێتە مەزاختن، بەلێ د چارچۆڤێ ھێزا ئەردی یا عیراقێ، ھەتاکو من داخوازکربوو 17%ێ بودجێ بەرگریا عیراقێ بۆ ھەرێما کوردستانێ بیت، وەزیرێ بەرگریێ راگەھاندبوو، ھەرێما کوردستانێ ھێزا دەریایی و ئەسمانی نینە، لەوڕا دڤێت د چارچۆڤێ ھێزا ئەردی و ھژمارا روونشتڤان بکەنە پیڤەر کا چەند بودجەی بۆ ھێزێن پێشمەرگەی ب ھنێرن بۆ ھەرێما کوردستانێ، مخابن ئەو ژی نەھاتە ھنارتن، ھەکە ئەو پەرلەمانتارێن کورد ل بەغدا راست دبێژن بودجێ پێشمەرگەی ژلایێ بەغدا ڤە یێ ھاتیە مەزاختن، بلا بێژن ئەو پارە چەندە یێ ھاتیە ھنارتن.
ئەشواقێ گۆت ژی” د پڕۆژە بودجێ 2016ێ دا، ئاماژە ب بودجێ پێشمەرگەی یا ھاتیە کرن، بەلێ دیسان د چارچۆڤێ ھێزا ئەردی یا عیراقێ و نە گوتیە چەند پارە بۆ پێشمەرگەی بھێتە مەزاختن، فەرە ئەم وەکو نوونەرێن کورد ل بەغدا پشتەڤانیێ دناڤ پەرلەمانی دا پەیدا بکەین و ھەر دەمێ ژڤانێ دانوستاندنێن بودجەی ھاتنە دەستپێکرن، پێشنیار بھێتە کرن، ئەو پارێ بۆ ھێزا پێشمەرگەی بھێتە مەزاختن ژ وەزارەتا بەرگریا عیراقێ بھێتە دیارکرن، وەکو سالێن بۆری ب ڕەنگەکێ گشتی ئاماژە پێ نەھێتە کرن، چونکی وی دەمی دەلیڤا ھندێ یا تێدا کو نەھێتە ھنارتن، یان ژی کێم بھێتە ھنارتن”.