ئەلمانیا دێ فرۆکێن خوە ل تورکیا بنەجھـ کەت
ئەڤرۆ نیوز، ئەیاد بەرواری:
حوکمەتا ئەلمانیا راگەھاند وێ ل بەرە دو فرۆکێن لەشکری ژ جۆرێ (تورنادۆ) یێن تایبەت ب کارێ چاڤدێریێ و دانا سۆتەمەنیێ بۆ فرۆکان ل ئەسمانی وەکو گەڕا ئێکێ ھنێریتە بنگەھێ ئەنجرلیک یێ ئەسمانی ل ویلایەتا ئەدەنە یا تورکی ل ڤێ ھەفتیێ.
بەرپرسەکێ لەشکرێ ئەلمانی بۆ ئاژانسا (ئەنادۆل) یا تورکی گوت” پەرلەمانێ ئەلمانیا رازی بوو ل سەر ھنارتنا دو فرۆکان بۆ بنگەھێ ئەنجرلیک د چارچۆڤێ شەڕێ دژی داعشێ دا”.
گوت ژی” 400 ھەتا 500 سەربازێن ئەلمانی دێ ھێنە ڕاسپاردن بۆ سەرپەرشتیا وان فرۆکان، زێدەباری 150 سەربازێن دی ژبۆ دانا سۆتەمەنیێ بۆ فرۆکان”.
پەرلەمانێ ئەلمانی ل رۆژا ئەینیا بۆری، رازیبوونا خوە دیارکربوو ل سەر ھنارتنا شەش فرۆکێن تورنادۆ بۆ بنگەھێ ئەنجرلیک یێ تورکی، زێدەباری رازیبوونێ ل سەر ھنارتنا ھزار و 200 سەربازێن ئەلمانی ژبۆ سەرپەرشتیا گەمیەکا تایبەت ب پاراستنا ھەلگرا فرۆکێن فرەنسی ( شارل دیگۆل).
