ئەمریكا:ئەم ل سووریێ مەیدانێ بۆ ئیرانێ چۆل ناكەین
ئەڤرۆ نیوز ، زنار تۆڤی :
نوونەرێ تایبەت یێ سەرۆكێ ئەمریكا بۆ هەڤپەیمانیا نێڤدەولەتی یا دژی داعشێ راگەهاند کو ئەمریكا بۆ داهاتی هیچ بۆشایەكێ ل سووریێ بجهناهێلیت بۆ هندێ کو ئیران پر بكەت.
برێت ماكگۆرگ د دیدارەکێدا بۆ كەنالێ حورە یێ ئەمریكی دووپات كریە كو وان 98% قەوارێ داعش وێران كریە، بەلێ هەتا تەمام ژ ناڤ نەبەین نا روونین، گوتیە ژی، هێزێن سووریا دیموكراتیک ب پشتەڤانیا هەڤپەیمانیا نێڤدەولەتی ل دژی داعشێ، ل رۆژا سێشەمبی دەست ب دوماهیک قۆناغا شەری كریە ل دژی داعش ل سووریا بۆ كۆنترۆلكرنا 2% یا وان دەڤەرێن ل سەر سنوورێن دناڤبەرا سووریا و عێراقێ ماینە د دەستێ داعشێ دا.
هەروەسا گوتیە، پتریا سەرانێن داعشێ و چەكدارێن بیانی یێن وێ رێكخراوێ خوە ل وان دەڤەران حەشار داینە،لەوما دهێتە چاڤەرێ کرن کو شەرەکێ درێژخایەن بیت،لێ چەكدارێن داعشێ چو جهێن دیتر نینن بچنێ، ، هەڤدەم ماكگۆرگ رەت كریە كو چارچوڤەکێ دەمی دیار بكەت بۆ دوماهی هاتنا ئۆپەراسیۆنا دوماهیێ یا سەربازی ل دژی داعشێ.
نوونەرێ ترەمپی دیارکر ژی،ئە پابەندین ب پشتەڤانیا هەڤپەیمانێن خوە ل سەر ئەردی هەتا دەمێ سەركەفتنێ ل سەر داعشێ، ئاماژە دا هندێ کو ئەمریكا و هەڤپەیمانێن خوە، ژ وان ژی فرنسا هێزەکا سەربازی یا كاریگەر ل سووریا هەیە، بەڵێ پلان نینە بۆ دامەزراندنا بنگەهەکێ سەربازی ل وێرێ و ئەم بۆ شەرێ داعش ل سووریێ نە.
