ئەمریکا داخوازەکێ ژ ئەنجوومەنێ نشتیمانی یێ کوردی ل سووریێ دکەت
ئەمریکا داخواز ژ ئەنجوومەنێ نشتیمانی یێ کوردی ل سووریێ دکەت ل گەل هێزێن دی یێن کوردی پێکڤە وەکو ئێک شاند بچنە شامێ و د ئاڤاکرنا حوکمەتا نوو یا سووریێ دا خوەدان رۆل بن و ئەمریکا پشتەڤانیێ ل مافێن کوردان ل سووریێ دکەت.
فەیسەل یوسف پەیڤدارێ ئەنجوومەنێ نشتیمانی یێ کوردی ل سووریێ راگەهاند د چەند رۆژێن بۆری دا وەکو ئەنجوومەنێ نشتیمانی یێ کوردی ل سووریێ ئەو ل گەل شاندەکێ ئەمریکی ل باژێرێ قاشملۆ یێ رۆژئاڤایێ کوردستانێ کۆمبووینە و د کۆمبوونێ دا شاندێ ئەمریکی دیار کریە، نها سووریێ د قۆناغەکا نوو دایە، دڤێت کورد هەموو پرسێن هەی د ناڤبەرا خوە دا چارەسەر بکەن و وەکو ئێک شاند بچنە شامێ، پشکداریا کوردان د قۆناغا بهێت یا سووریێ دا گەلەک گرنگە، دڤێت کوردان رۆلەکێ کاریگەر د ئاڤاکرنا حوکمەتا نوو یا سووریێ دا هەبیت.
ناڤهاتی ئەو یەک ژی دیار کر، شاندێ ئەمریکی داخواز ژ وان کریە ل گەل هەموو هێزێن دی یێن کوردی ل سووریێ دەست ب قۆناغەکا نوو بکەن، چونکی گەلەک گرنگە کورد ب رەنگەکێ بهێز پشکداریێ د قۆناغا نوو ل سووریێ دا بکەن و وەکو ئەمریکا ئەو پشتەڤانیێ ل مافێن کوردان ل سووریێ دکەن، لێ گرنگە کورد ژی د ناڤ خوە دا ئێکگرتی بن و پێکڤە کار بکەن و گۆت: (بەری نها ژی شاندێن ئەمریکی و فرەنسی هەمان داخوازی ژ ئەنجوومەنێ نشتیمانی یێ کوردی ل سووریێ کرینە و وەکو ئەنەکەسە وان دڤێت ل گەل هەموو هێزێن کوردی پێکڤە دەست ب قۆناغەکا نوو بکەن و هەموو پرسێن هەی چارەسەر بکەن، چونکی گرنگە د سیستەمێ بهێت یێ سووریێ دا کورد خوەدان پێگەهەک بهێز بن و ژ بۆ ڤێ یەکێ ژی پێکڤەکارکرنا هێزێن کوردی ل سووریێ گەلەک یا گرنگە).
ئەو یەک د دەمەکێ دایە کو نها پڕانیا وەلاتێن ئێکەتیا ئۆرۆپا ب تایبەتی ژی فرەنسا و ئەلمانیا ب رەنگەکێ ئاشکرا پشتەڤانیا خوە بۆ مافێن رەوا یێن گەلێ کورد ل سووریێ دیار دکەن و پشتی هەر دو وەزیرێن دەرڤە یێن فرەنسا و ئەلمانیا سەرەدانا سووریێ کری بۆ دەزگەهێن راگەهاندنێ دیار کرن دڤێت کوردان رۆلەکێ بەرچاڤ د سیستەمێ بهێت یێ سووریێ دا هەبیت، بێی پشکداریا کوردان پرسێن هەی چارەسەر نابن و وەکو ئەلمانیا و فرەنسا مەرجێ وان بۆ حوکمەتا نوو یا سووریێ ئەوە کو دڤێت مافێن کوردان بهێنە پاراستن.
چاڤدێرێن سیاسی ژی دیار دکەن، نها دەلیڤەیەکا گەلەک مەزن بۆ کوردان ل سووریێ هاتیە پێش و گەلەک وەلاتێن جیهانێ پشتەڤانیێ ل کوردان دکەن، ژ بەر ڤێ یەکێ ژی گەلەک گرنگە هەر دو جڤاتێن کوردی یێن رۆژئاڤایێ کوردستانێ هەموو پرسێن هەی د ناڤبەرا خوە دا چارەسەر بکەن و وەکو ئێک شاند بچنە شامێ.
