ئەمریکا: داعش ترومبێلێن تویوتا ژ کیرێ دئینیت ؟
ئەڤرۆ نیوز، ئەیاد بەرواری:
بەرپرسێن بەرھنگاریا تیرۆرێ ل ئەمریکا داخواز ژ کۆمپانیا (تویوتا) یا یابانی کر ھاریکاریا وان بکەت بۆ ئاشکراکرنا وی ژێدەرێ داعش ترومبێلێن جێب و پێک ئاب ژ جۆرێ تویوتا بدەستڤەدئینیت.
کەنالێ (ئەی بی سی) یێ ئەمریکی ژ ھندەک ژێدەرێن حکومی ڤەگوھاست کو واشنتۆن ب دلگرانی سەحدکەتە زێدەبوونا ھژمارا ترومبێلێن تویوتا ددەستێ داعشێ دا کو ئەڤ چەندە د گرتەیێن ڤیدیۆیی دا ئەوێن داعش بەلاڤ دکەت دیاردبیت.
ل دووڤ وی کەنالێ ئەمریکی، تویوتا کو کۆمپانیا دویێ ل جیھانێ ل سەر ئاستێ دروستکرنا ترومبێلان، دیارکریە کو وێ چو پێزانین ل سەر ڤێ پرسێ نینن، لێ ئەو پشتەڤانیێ ل ڤەکۆلینا ژلایێ پشکا بەرھنگاریا دراڤدانا تیرۆرێ ل وەزارەتا دارایی یا ئەمریکی دکەت.
کۆمپانیا تویوتا خویاکریە ژی کو وێ زنجیرا لیستێن فرۆتنا ترومبێلان بۆ رۆژھەلاتا ناڤین و ئەو پێرابوونێن ئەمنی یێن دوەرگریت کو ئەو ترومبێل نەکەڤنە ددەستێ کەسێن دێ بکارئینن د چالاکیێن لەشکری و تیرۆرستی دا، داینە وەزارەتا دارایی یا ئەمریکی، د ھەمان دەمدا دیارکرژی کو ئەو نەشێت وان ترومبێلان دەستنیشان بکەت یێن ھاتینە دزین یان دوبارە فرۆتن ژلایێ ھندەک کەسان ڤە کو چو پەیوەندی ب کۆمپانیا تویوتا ڤە نەبیت.
مارک والاس بالیۆزێ ئەمریکی یێ بەرێ ل نەتەوێن ئێکگرتی و شارەزا د بەرھنگاریا تیرۆرێ دا بۆ کەنالێ ئەمریکی گوت” مخابن ترومبێلێن تویوتا ژ جۆرێ (لاندگرۆز و پێک ئاب ھیلوکس) یێن بووینە پشکەک ژ مارکا داعشێ و ئەو رێکخستیا تیرۆرستی وان ترومبێلان د چالاکیێن لەشکری و تیرۆرێ بکاردئینیت و د ھەموو وان گرتەیێن ڤیدیۆیی دا یێن کو داعش بەلاڤ دکەت، کاروانێ ترومبێلێن تویوتا تێدا دەردکەڤن و ئەڤ چەندە جھێ دلگرانیا مە یا مەزنە.
دھێتە زانین ئەڤە چەندین سالە پرسیار دھێنە کرن ل دۆر بکارئیانا ترومبێلێن تویوتا ژلایێ داعشێ ڤە و ل سالا ٢٠١٤ ێ، ھندەک راپۆرتێن رۆژنامەڤانی بەحس ل پێشکەشکرنا وەزارەتا دەرڤەیا ئەمریکی بۆ ٤٣ ترومبێلێن تویوتا بۆ ئۆپۆزسیۆنا سووری دکر و د راپۆرتەکێ دا کو ژلایێ رۆژنامەکا ئوسترالی ھاتیە بەلاڤکرن بەحس ل بەرزەبوونا ٨٠٠ ترومبێلێن تویوتا ل باژێرێ سیدنی ل سالێن ٢٠١٤ و ٢٠١٥ دکەت و شارەزایێن بەرھنگاریا تیرۆرێ ب دوور نابینن کو ئەو ترومبێل بۆ دەڤەرێن بن دەستێ داعشێ ھاتبنە ھنارتن.
ئەو پێزانینێن کۆمپانیا تویوتا ب خوە داین ئاماژێ ب زێدەبوونا نەچاڤەرێکری د فرۆتنا ترومبێلێن تویوتا ژ جۆرێن (لاندگرۆز و پیک ئاب ھیلوکس) ل عیراقێ دکەن ژ شەش ھزار ترومبێلان ل سالا ٢٠١١ ێ بۆ ١٨ ھزار ترومبێلان ل سالا ٢٠١٣ ێ، لێ رێژەیا فرۆتنێ ل سالا ٢٠١٤ێ بۆ ١٣ ھزار ترومبێلان ھاتە خوار.
ئەو کەنالێ تەلەڤزیونی یێ ئەمریکی ژ زاردەڤێ عەمید (سەعەد معەن) پەیڤدارێ وەزارەتا ناڤخوەییا عیراقێ ڤودگوھێزیت” گومانل دەف مە یا ھەی کو ناڤبەرێن فرۆتنا ترومبێلان ژ دەرڤەی عیراقێ کار ل سەر ئینانا ترومبێلێن تویوتا ب قاچاغی بۆ ناڤ عیراقێ دکەن و حوکمەتا عیراقی ژی نەشێت کونترۆلا سنۆرێ خوە ل گەل سووریێ بکەت.
