ئەمریکا دێ ئەردۆگانی بۆ چارەکرنا پرسا کوردی تەنگاڤ کەت
ئه‌ڤرۆ نيوز:
بالیۆزێ بەرێ یێ ئەمریکا ل تورکیا دیار دکەت کو ئەمریکا ژ سیاسەتا نھا یا تورکیا ل ھەمبەر کوردێن رۆژئاڤا دلگرانە و دخوازیت تورکیا چو ئاریشان ل ھەمبەر ستراتیژیا ئەمریکا دروست نەکەت و ژ بەر ھندێ ژی ئەمریکا دێ ئەردۆگانی تەنگاڤ کەت کو پرسا کوردی ل تورکیا چارە بکەت دا پاشی پەیوەندیێن تورکیا و یەپەگێ ژی ئاسایی ببن.
جێمز جێفری بالیۆزێ بەرێ یێ ئەمریکا ل تورکیا بۆ ئاژانسا کیپچر بریف یا ئەمریکی دیار کریە کو دۆنالد ترامپ سەرۆکێ نوو یێ ئەمریکا دڤێت د زووترین دەم دا داعشێ ژناڤ ببەت، ژ بەر ھندێ ژی ترامپ بزاڤێ دکەت کو پتر ھاریکاریا ھێزێن کوردی ل سووریێ و عیراقێ بکەت چونکو وان رۆلەکێ سەرەکی ل شەرێ دژی داعشێ گێراینە، لێ تورکیا ژ بەر ناکۆکیێن ل گەل پەکەکێ ئالۆزیان بۆ ستراتیژیا ترامپی ل رۆژئاڤایێ کوردستانێ دروست دکەت و ژ بەر ھندێ ژی ئەمریکا دێ تورکیا تەنگاڤ کەت دا پرسا کوردی ل وەلاتێ خوە چارە بکەت دا پاشی ژی پەیوەندیێن تورکیا و یەپەگێ ئاسایی ببن و گۆت: (د ستراتیژیا نوو یا ترامپی دا کوردێن رۆژئاڤا خوەدان جھەکێ گرنگن لێ مخابن ژ بەر ناکۆکیێن تورکیا و یەپەگێ ئالۆزی بۆ ستراتیژیا ترامپی دروست دبن و ئەمریکا دێ بزاڤەکا مەزن کەت دا ئەردۆگان دەست ب چارەکرنا پرسا کوردی ل تورکیا بکەت چونکو ھەکە پرسا کوردی ل تورکیا چارە بیت ئەو یەک دێ کارتێکرنا خوە ل ھەلویستێ تورکیا ل سووریێ و رۆژئاڤایێ کوردستانێ ژی بکەت).
بالیۆزێ بەرێ یێ ئەمریکا ھەروەسا دیار دکەت کو د دەمێن بۆری دا سەرەرای گەفێن تورکیا ئەمریکا ھاریکاریا ھێزێن سووریا یا دیموکراتیک کر و نھا ژی بۆ تورکیا گرنگە ئەردۆگان پرسا کوردی ل وەلاتێ خوە چارە بکەت و گۆت: (ئەز وەسا دبینم ھەکە ئەردۆگان د ریفراندۆمێ دا سەرکەڤیت و ببیتە سەرۆکێ تورکیا دێ دەست ب چارەکرنا پرسا کوردی کەت، چونکو وی دەمی ئەردۆگانی دێ دەستھەلاتەکا تەمام ھەبیت و دشێت گەلەک تشتان ب سەرێ خوە بکەت، د سیستەمێ نھا یێ تورکیا دا گەلەک ئاستەنگی ل ھەمبەر ئەردۆگانی ھەنە).
بالیۆزێ بەرێ یێ ئەمریکا ئاماژە ب ڤێ یەکێ ژی دکەت کو نھا ئەردۆگان ب رەنگەکێ توند و دژوار ل دژی کوردان کار دکەت دا بشێت دەنگێ نەتەوەپەرستان ل تورکیا بدەستڤە بینیت، لێ ھەکە ئەردۆگان د ریفراندۆمێ دا سەرکەڤت دێ ھەلویستێ وی نەرم بیت و ئەز باوەرم دێ ل گەل سەرۆکێ پەکەکێ ل زیندانێ جارەکا دی دەست ب دانوستاندنان ھێتە کرن چونکو ھەموو کەسەک باش دزانیت ئۆجەلانی کاریگەریەکا مەزن ل سەر پەکەکێ و یەپەگێ ژی یا ھەی.
د دووماھیا داخۆیانیا خوە دا بالیۆزێ بەرێ یێ ئەمریکا دیار دکەت کو ترامپی نەڤێت چو ئالۆزی ل ھەمبەر ژناڤچوونا داعشێ دروست ببن، ژ بەر ھندێ ژی گرنگیێ ددەتە رۆلێ تورکیا و ل ئالیێ دی ژی نەڤێت بێی پشکداریا ھێزێن سووریا یا دیموکراتیک دەست ب ئۆپەراسیۆنا رەققە بکەت و ژ بەر ھندێ ژی ئەمریکا دڤێت ئەردۆگانی تەنگاڤ کەت دا دەست ب چارەکرنا پرسا کوردی ل وەلاتێ وە بکەت و ھەکە ئەمریکا شیا د وێ پێنگاڤا خوە دا سەرکەفتی بیت و پرسا کوردی ل تورکیا ھاتە چارەکرن وی دەمی چو ئالۆزی د ناڤبەرا یەپەگێ و تورکیا دا نامینن و د دەمەکێ وەسا دا دێ رەوشا سووریێ و ب تایبەتی ژی رۆژئاڤایێ کوردستانێ ئارام بیت، چونکو تورکیا چو ئاریشە ل گەل کوردێن سووریێ نینن ئاریشا سەرەکی یا تورکیا یەپەگە یە کو ھێزەکا سەر ب پەکەکێ یە و ھەکە پرسا پەکەکێ ل تورکیا چارە بیت دێ پرسا یەپەگێ ژی ھێتە چارەکرن و ژ بەر ھندێ ژی ئەمریکا بۆ چارەکرنا وێ پرسێ دێ ئەردۆگانی تەنگاڤ کەت.
