ئەمریکا پارەی بۆ ئاڤەدانکرنا عیراقێ نادەت
ئەڤرۆ، ئەیاد بەرواری:
رۆژنامەکا ئەمریکی بەلاڤکر کو واشنتۆن ب چو شێوەکی پارەی بۆ ئاڤەدانکرنا عیراقێ نا بەخشیت، بەلکو چاڤەرێ دکەت وەلاتێن کەنداڤی ھاریکاریا عیراقێ بکەن.
داگیرکرنا چەندین دەڤەران ل عیراقێ ژلایێ داعشێ ڤە ل 2014 وپاشی شەرێ دەرکرنا وێ رێکخستیا تیرۆرستی ژ دەڤەرێن دبن دەستێ وێ ڤە، زیانەکا مەزن گەھاندە ژێرخانا ئابووری ل عیراقێ کو ب گوژمێ پتر ژ 45 ملیار دۆلاران دھێتە خەملاندن.
رۆژناما (وول ستریت جورنال) یا ئەمریکی، د راپۆرتەکا خوە دا ب رەخنەڤە ئاماژە ب وێ چەندێ دا کو ل عیراقێ، حەفت پارێزگەھێن باکوور ورۆژئاڤایێ وێ کەفتنە دبن ھەوا کاڤرکرنا داعشێ، بەلێ حوکمەتا بەغدا ژدەستپێکا ژناڤبرنا داعشێ وھەتا نوکە چو پێنگاڤەک بۆ راستڤەکرنا رەوشا وان دەڤەران نەھاڤێتیە وھەتاکو دپرسا ڤەگەراندنا ئاواران ژی بۆ دەڤەرێن وان یێن رەسەن، شکەستن یا ئینای.
رۆژناما ناڤبری بەلاڤکر ژی کو دچارچۆڤێ کۆنگرێ ئاڤەدانکرنا عیراقێ دا ئەوێ ل کوێتێ دھێتە ئەنجامدان، چاڤەرێ دھێتە کرن راپۆرتا ھەلسەنگاندنا زیانێن داعشێ بھێتە بەرچاڤکرن کو ژلایێ بەنکا نێڤدەولەتی وحەکمەتا عیراقێ ڤە ھاتیە بەرھەڤکرن، بۆ وێ چەندێ لایەنێن بەخشینەر ووەبەرھێنەرژ نێزیک ڤە ئاگەھداری رەوشێ ببن.
راپۆرتا ھەلسەنگاندنێ ئاماژە دایە بۆ ئاڤەدانکرنا دەڤەرێن وێرانکری ل حەفت پارێزگەھێن عیراق، پێدڤی ب کۆژمێ 88ملیار دۆلاران ھەیە، بەلێ ھەر ژ نوکە ئەمریکا یا راگەھاندی کو ھاریکاریا عیراقێ ناکەت، بەلکو پشت بەستنێ ب بەخشینێن وەلاتێن کەنداڤی دکەت.
رۆژناما ئەمریکی پێشبنیێ دکەت کو وەلاتێن کۆمبەخش ژی وی کۆژمێ مەزن یێ پارەی نەدەن، بەلکو ئەو وەلات ئەرکێن خوە ب رێیا کۆمپانیێن کەرتێ تایبەت ئەنجام بدەن، بۆ وێ چەندێ کۆمپانیێن وان وەبەرھێنانێ ل عیراقێ بکەن، بەلێ ژبەر نەبوونا ئێمناھیێ ل دەڤەرێن جودا ل عیراقێ، دبیت وەبەرھێنان ژی ب رێژەکا وەسا نەھێتە کرن.
