ئەمریکا کورد کرینە مەرجێ باشکرنا پەیوەندیێن خوە ل گەل تورکیا
ئه‌ڤرۆ نيوز:
نوونەرێ رۆژناما حوریەتێ ل ئەمریکا و ڤەکۆلەرێ ناڤدارێ تورکیا دیار دکەت کو چەندین جاران بەرپرسێن ئەمریکا د ھەڤدیتنێن ل گەل بەرپرسێن تورکیا بۆ وان دیار کرینە کو دڤێت تورکیا د ناڤ خوە دا پرسا کوردی چارە بکەت و دەستێوەردانێ د کاروبارێن رۆژئاڤایێ کوردستانێ نەکەت و ھەکە تورکیا وێ یەکێ بکەت دێ پەیوەندیێن ھەر دو ئالیان جارەکا دی ئاسایی ببنە ڤە.
تۆلگا تانیش نوونەرێ رۆژناما حوریەتێ یا تورکیا ل ئەمریکا و ڤەکۆلەرێ ناڤدارێ تورک دیار کریە کو د ھەڤدیتنێن چەند رۆژێن بەری د ناڤبەرا نوونەرێن ئەمریکا و تورکیا دا و ھەر وەسا د پەیوەندیا تەلەفونی یا د ناڤبەرا ئەردۆگانی و ئۆبامایی دا ژی ئەمریکا ب چو رەنگەکێ نەگۆتیە کو پیگ بۆ مە مەترسیە و ئەم دێ دەستان ژ وان بەردەین، ھەر وەسا ئەمریکا ب چو رەنگەکێ نەگۆتیە کو YPG ھێژە تیرۆرستە، ھەرچەندە چەندین جاران ئەردۆگانی ژ بۆ ئەمریکا گۆتیە یان دڤێت ھین مە ھەلبژێرن یان ژی YPG لێ ئەمریکا گوە نەدایە داخوازیا ئەردۆگانی و ئەو یەک ژی پەیامەکا ئاشکرا یا ئەمریکا بۆ تورکیا کو دڤێت ھەلویستێ خوە ل ھەمبەر کوردان بگوھۆریت.
ناڤھاتی د بەردەوامیا ئاخڤتنا خوە دا ئەو یەک ژی دیار کریە کو ئەمریکا ب رەنگەکێ ئاشکرا بۆ تورکیا دیار کریە کو دڤێت ھین پرسا کوردی ل ناڤ خوە دا چارە بکەن، واتە شەرێ نھا ل باژێرێن کوردان بدەنە راگرتن و دەست ب قۆناغا ئاشتیێ و چارەکرنا پرسا کوردی بکەن، ھەروەسا ژ بۆ تورکیا دبێژیت کو نابیت ھوون دەستێوەردانێ د کاروبارێ ناڤخوە یێ رۆژئاڤایێ کوردستانێ ژی بکەن، ژ بەر ھندێ ژی تورکیا ژ بلی بومبەباران کرنا ھندەک دەڤەرێن رۆژئاڤایێ کوردستانێ ھەتا نھا ژی نەشیایە ب فەرمی بکەڤیتە ئاخا سووریێ، چونکو ئەمریکا ب چو رەنگەکێ وێ یەکێ قەبوول ناکەت.
تۆلگا تانیشی ھەروەسا ئاماژە ب ڤێ یەکێ ژی کریە کو ئەمریکا ب چو رەنگەکێ رێ نادەت ھەرێمەکا ئارام ل سەر سنۆری دا بھێتە ئاڤاکرن، چونکو چەندین جاران بەرپرسێن ئەمریکی بۆ من دیار کرینە کو تورکیا دڤێت ب رێیا دروست کرنا ھەرێمەکا ئارام دیموگرافیا رۆژئاڤایێ کوردستانێ بدەتە گوھۆرین و ئەو یەک ب چو رەنگەکێ ناھێتە قەبوول کرن و ئەم پشتەڤانیێ ل تورکیا ناکەین، بەرپرسێن ئەمریکی دبێژن کو تورکیا ھەتا نھا ژی چەکدارێن ھشکباوەر رەوانەی سووریێ دکەت دا شەرێ کوردان بکەن و ئەمریکا ژ وی ھەلویستێ تورکیا گەلەک دلگرانە.
ناڤھاتی د دووماھیا ئاخڤتنا خوە دا ئەو یەک ژی دیار کریە کو مەرجێ ئەمریکا بۆ ئاسایی کرنا پەیوەندیێن ل گەل تورکیا کوردن. واتە دڤێت تورکیا د ناڤ خوە دا پرسا کوردی چارە بکەت و دەستێورەدانێ د کاروبارێ رۆژئاڤایێ کوردستانێ دا نەکەت و ھەتا تورکیا ل سەر سیاسەتا خوە یا نھا بەردەوام بیت ئەز باوەرم پەیوەندیێن تورکیا و ئەمریکا ئاسایی نابن و تورکیا دێ زەرەرمەندێ یەکێ بیت.
