ئەمریکا گەرەنتی دایە کو ناھێلیت تورکیا بکەڤیتە ئاخا رۆژئاڤایێ کوردستانێ
ئه‌ڤرۆ نيوز:
شەر و پێکدادانێن د ناڤبەرا ھێزێن کوردی و تیرۆرستێن داعشێ دا ل حەسەکە و ل نێزیکی باژێرکێ جەرابلوس بەرفرەە دبیت و ژێدەرەک ژ ھێزێن (YPG) راگەھاند ئەمریکا ژ وان خواستیە د دەمەکی لەز دا باژێرکێ جەرابلوس و باژێرێ حەسەکە بێخنە ژێر کۆنترۆلا خوە و گەرەنتی دایە کوردان کو ناھێلیت تورکیا بکەڤیتە ئاخا رۆژئاڤایێ کوردستانێ.
پۆلات جان پەیڤدارێ ھێزێن (YPG) د داخۆیانیەکی دا بۆ رۆژناما ئەڤرۆ راگەھاند کو ئۆپەراسیۆنێن ھێزێن وان ل حەسەکە و نێزیکی جەرابلوس ل دژی تیرۆرستێن داعشێ بەردەوام دکەن و گۆت: (نھا پرانیا باژێرێ حەسەکە ب ھەردو پرێن د ناڤبەرا باشور و باکورێ دا ل ژێر کۆنترۆلا ھێزێن مە دانە و د شەرێ ٢٤ دەمژمێرێن بۆری دا ٣٩ تیرۆرست ھاتینە کوشتن و بۆ کۆنترۆلکرنا ھەموو تاخێن باژێر ئۆپەراسیۆنێن مە بەرفرەھتر بووینە).
پۆلات ھەروەسا دیار ژی کر بۆ ئازادکرنا باژێرکێ جەرابلوس و گرێدانا ھەردو کانتۆنێن عەفرین و کۆبانێ ئۆپەراسیۆنەکا دژوار و بەرفرەە داینە دەستپێکرنێ و گۆت: (بۆ پاراستنا ھەردو کانتۆنان دڤێت ھەموو باژێرک و گوندێن د ناڤبەرا عەفرین و کۆبانێ دا بھێنە رزگارکرن و نھا کار بۆ ڤێ یەکێ دھێتە کرن و ئەز باوەر دکەم ئەم دێ د دەمەکی نێزیک دا مزگینیەکا دی بدەینە گەلێ خوە).
پۆلات ل سەر پەیوەندیێن کانتۆنێن کۆبانێ و ھێزێن شەرڤانێن کورد ل گەل رژێما سووریێ ژی راگەھاند کو چو پەیوەندیێن راستەوخوە ل گەل رژێما سووریێ نینن و گۆت: (ھندەک ئالی و دەزگەھێن راگەھاندنێ دخوازن مە وەک ھەڤکارێ رژێمێ بدەنە خوەیاکرن، لێ ئەڤ داخوازێن وان سەرناگریت ژ بەر کو چو پەیوەندیێن ھێزێن مە لگەل رژێما ئەسەدی نینن و جار ب جار د شەرێ ل دژی تیرۆرستێن داعشێ دا د یەک بەرەیێ دا ئەم نێزیکی ھەڤدو دبین وەک نموونا حەسەکێ).
ل ئالیێ دی بەرپرسەکی ھێزێن شەرڤانێن کورد کو نەخواست ناڤێ خوە ئاشکرا بکەت ژی راگەھاند کو ل ژوورا ئۆپەراسیۆنێن ھەڤپەیمانێن نێڤدەولەتی ل گەل فەرماندارێن ئەمریکی کۆمبوونەک سازکرینە و د کۆمبوونێ دا فەرماندارێن ئەمریکی دیار کرینە کو دێ ب فرۆکێن شەری بەردەوام ھەڤکاریا ھێزێن وان بکەن ھەتا کو تیرۆرستێن داعشێ ب تەمامی ژناڤ دچن و گۆت: (بەرپرسێن ھەڤپەیمانا نێڤدەولەتی و ئەمریکا دخوازن کو د زووترین دەم دا ھەرسێ کانتۆنێن رۆژئاڤایێ کوردستانێ بگەھنە ھەڤدو و گوند و باژێرکێن ل ژێر کۆنترۆلا داعشێ دا بھێنە ئازادکرن).
ھەمان ژێدەری ھەروەسا دیار ژی کر ھێزێن ئەمریکا دوپات کرینە کو ناھێلن ھێزێن سەربازێن تورکیا بکەڤنە دەڤەرا جەرابلوس و عەزەز یا رۆژئاڤایێ کوردستانێ و سۆز داینە ھێزێن وان دێ د ئازادکرنا ھەموو رۆژئاڤایێ کوردستانێ دا ھەڤکارێ وان بن و گۆت: (نھا ب تنێ جەرابلوس و ھندەک گوندێن د ناڤبەرا کانتۆنێن عەفرین و کۆبانێ دا ل بن کۆنترۆلا تیرۆرستان دا ماینە و ئەز باوەر دکەم ب دەستپێکرنا ئۆپەراسیۆنا ئازادکرنا دەڤەرێن د ناڤبەرا ھەردو کانتۆنان دا دێ د دەمەکی کورت دا تیرۆرست ژ دەڤەرێ بھێنە پاقژکرن و ب ڤی رەنگی ھەموو ئاخا رۆژئاڤایێ کوردستانێ ئازاد ببیت).
ل ئالیێ دی ل حەلەبێ ژی شەر و پێکدادانێن گەلەک بەرفرەە د ناڤبەرا ھێزێن رژێما ئەسەدی و بەرەیێ ئەل نوسرە و ١٣ کۆمێن ئیسلامی یێن ل گەل ئەل نوسرە بەردەوام دکەن و د ٤٨ دەمژمێران دا ٥٨ چەکدارێن
رێکخستنا تیرۆرست یا ئەل نوسرە ھاتینە کوشتن و د ئەنجاما تۆپبارانا ھەردو ئالیان دا ٢٧ وەلاتیێن سڤیل ژی گیانێ خوە ژ دەست داینە.
