ئەمریکا ھەلویستێ خوە ل دۆر پاشەرۆژا رۆژئاڤایێ کوردستانێ ئاشکرا کر
ئه‌ڤرۆ نيوز:
بەرپرسەکێ ئەمریکی دیار کریە کو پشتی شەرێ داعشێ ل سووریێ ب دووماھی بھێت ھێزێن ئەمریکا دێ ل رۆژئاڤایێ کوردستانێ بمینن و جارێ ئەمریکا ناخوازیت دەڤەرێ بۆ چو ھێزەکا دی چۆل بکەت و ل گەل فرەنسا دێ دەڤەرێن ل ژێر کۆنترۆلا ھێزێن کوردی پارێزن.
بەرپرسەکێ ئەمریکا بۆ رۆژناما واشنتۆن پۆست ل دۆر پاشەرۆژا رۆژئاڤایێ کوردستانێ و سیاسەتا ئەمریکا ل دۆر سووریێ دیار کریە کو ئەمریکا نھا بەرھەڤ نینە کو ھێزێن خوە ژ سووریێ ڤەکێشیت، چونکو شاشیا بەری نھا مە ل عیراقێ کری مە نەڤێت ل سووریێ ژی دوبارە بکەین. ھەکە ئەم ھێزێن خوە ژ سووریێ ئانکۆ رۆژئاڤایێ کوردستانێ ڤەکێشین دێ ھەڤپەیمانێ مە ل وێرێ تووشی مەترسیێ ببن دڤێت ئەم وان ب پارێزین و ژ بەر ھندێ ژی نھا ئەمریکا دخوازیت ھاریکاریا ھێزێن کوردی بکەت دا ئەو بشێن خوە بۆ ھەر شەرەکی بەرھەڤ بکەن.
ھەمان بەرپرسێ ئەمریکا دیار کریە کو پشتی ژناڤچوونا داعشێ ژی دێ پێدڤیا ئەمریکا ب ھێزێن کوردی ھەبیت، نھا ل سووریێ ھێزێن سووریا دیموکراتیک و یەپەگە ھەڤپەیمانێن ئەمریکا نە و شیان دربێن کوژەک ل داعشێ بدەن، ھەکە ھێزێن کوردی نەبان ژناڤچوونا داعشێ وەسا ئاسان نەدبوو، ژ بەر ھندێ ژی نھا داعش دخوازیت جارەکا دی خوە ل سووریێ ب ھێز کەت و خوە بۆ شەرەکی مەزن بەرھەڤ دکەت، تنێ ھێزا سەر ئەردی کو بشێت شەرێ تیرۆرستێن داعشێ بکەت ھێزێن سووریا دیموکراتیک و یەپەگە نە و ژ بەر ھندێ ژی ئەم دێ بەردەوام پشتەڤانیا وان بکەین.
ل دۆر ستراتیژیا ئەمریکا و ھاریکاریا وان بۆ دەڤەرا کوردی ژی دیار کریە کو ئەمریکا دخوازیت کورد ل سووریێ بگەھنە مافێن خوە، ژ بەر ھندێ ژی مانا ھێزێن ئەمریکا ل رۆژئاڤایێ کوردستانێ گرنگە و ھەتا ھێزێن ئەمریکا ل باکورێ سووریێ ئانکۆ رۆژئاڤایێ کوردستانێ بمینن چو ھێزێن دی نەشێن ھێرشی کوردان بکەن، ئەمریکا دخوازیت کوردان ل ھەمبەر ھەر ھێرشەکێ ب پارێزیت و چو راستی بۆ ھندێ ژی نینە کو دبێژن دێ ئەمریکا دەستان ژ پشتەڤانیکرنا ھێزێن کوردی ل رۆژئاڤایێ کوردستانێ بەردەت.
ئەڤ داخۆیانیا بەرپرسێ ئەمریکی د دەمەکێ دایە کو بەری نھا فەرماندارەکێ ھێزێن سووریا دیموکراتیک دیار کربوو کو ئەمریکا بریار دایە ھێزێن خوە ژ رۆژئاڤایێ کوردستانێ ڤەکێشیت و ئێدی وەکو بەرێ ھاریکاریا مە ناکەن و ھەکە رەوش وەسا بەردەوام بیت دێ کارتێکرنا خوە ل شەرێ دژی داعشێ کەت، چونکو ئەو ھاریکاریا کو بریار بوو بگەھیتە دەستێ مە ھاتیە راگرتن و تورکیا ژ رەوشا نھا دلخوەشە.
چاڤدێرێن سیاسی ژی دیار دکەن کو پشتی ئەمریکا خوە ژ رێککەفتنا ئەتۆمی یا ل گەل ئیرانێ ڤەکێشای و نھا دەست ب سزادانا ئیرانێ کریە ئەمریکا دێ پتر پێدڤی ھێزا کوردی بیت، چونکو سووریە جھەکێ گرنگە بۆ ئیرانێ و ھەکە ئەمریکا بخوازیت ئیرانێ لاواز بکەت دڤێت ل سووریێ و عیراقێ ھاریکاریا کوردان بکەت دا پێگەھێ کوردان ب ھێز بیت، چونکو ژ بلی کوردان نھا ھەموو ھێزێن دی ل عیراقێ و سووریێ ل ژێر کۆنترۆلا ئیرانێ دانە و ئەمریکی ژی باش دزانن کو نەشێن ب رێیا چو ھێزەکا دی ژ بلی کوردان ئاستەنگیان ل ھەمبەر دەستێوەردانێن ئیرانێ ل دەڤەرێ دروست بکەن، ژ بەر ھندێ ژی کورد دشێن ببنە ھێزەکا کاریگەر بۆ ستراتیژیا نوو یا ئەمریکا ل دەڤەرێ، ژ بەر ھندێ ژی ئەمریکا جارێ ناخوازیت ھێزێن خوە ژ رۆژئاڤایێ کوردستانێ ڤەکێشیت.