ئەنجامێن ھەلبژارتنان شەرێ ل تورکیا دژوارتر لێ کر
ئەڤرۆ نیوز:
پشتی ھەلبژارتنێن پەرلەمانی ئۆپەراسیۆنێن سوپایێ تورکیایێ ل باکورێ کوردستانێ دژوارتر بووینە و باژێرێ ئامەدێ بوویە ناڤەندا شەری و د ناڤا دو رۆژان دا شه‌ش لاوێن کورد یێن سڤیل ژ ئالیێ ھێزێن ئێمناھیێن تورکیا ڤە ھاتینە کوشتن و شەر و پێکدادانێن د ناڤبەرا گەریلان و سەربازێن تورک دا ل ھەموو باکورێ کوردستانێ بەلاڤ بوویە.
پشتی سەرکەڤتنا ئاکپارتی د ھەلبژارتنێن پەرلەمانێ تورکیا دا شەر و پێکدادانێن د ناڤبەرا PKK و سەربازێن تورک دا بەرفرەە بوویە و ل ھەموو دەڤەرێن باکوری بەلاڤ بوویە. د ڤێ دەربارێ دا رەجەب تەیب ئەردۆگان سەرۆک کۆمارێ تورکیا راگەھاند کو وی فەرمانا ئۆپەراسیۆنێن سەربازی دایە و گۆت: (ھەتا یەک تیرۆرست ل تورکیا مابیت دێ ئۆپەراسیۆن ب دژواری بەردەوام بن و ژ بلی ئۆپەراسیۆنێن سەربازی و ژناڤبرنا تیرۆرستان چو رێکەکا دی نینە، ژ بەر کو ھەتا چەک د دەستێ وان دا ھەبیت رۆلێ سیاسەتێ نابیت و مافێ مەیە ئەم ل دژی تیرۆرستان شەری بکەین، لێ دڤێت ھەرکەس ھشیار بیت برایێن مە یێن کورد و تیرۆرستان تێکەلی ھەڤدو نەکەن).
ھەر د ڤێ مژارێ دا جەمیل بایک ھەڤسەرۆکێ دەستەیا سەرۆکاتیا PKK ژی بۆ تەلەفزیۆنا ستێرک راگەھاند ئەو ئاگربەستا یەک ئالی یا کو بەری ھەلبژارتنێن پەرلەمانی راگەھاندبوون ب داوی ھاتیە و گۆت: (سەرۆک کۆمار و حوکمەتا تورکیا ژ بلی شەر و بەرخوەدانێ چ رێکەکا دی نەھێلاینە و د رەوشەکا وەسا دا بەرخوەدان و پاراستنا گەلێ کورد ئەرکێ سەر ملێ مەیە و ئەم دێ شەری ل ھەر دەڤەرەکا تورکیا بەلاڤ کەین و داگیرکەران ژ ئاخا کوردستانێ دەرخینین).
جەمل بایک ھەروەسا راگەھاند ژی کو دەولەتا تورکیا ل باکورێ کوردستانێ ب گشتی و ل ئامەدێ و جزیرا بۆتان ب تایبەتی ھێرشێن دژوار ل دژی وەلاتیێن سڤیل دەستپێکریە و د ناڤا دو رۆژان دا شەش وەلاتیێن کورد شەھید کرینە و ھژمارەک ژی بریندار بووینە و گۆت: (بەرخوەدان و پاراستنا گەلێ کورد ئەرکەکێ مرۆڤیە و ئەم دێ ب ھەر رەنگەکێ گەلێ خوە پارێزین و ھەموو تورکیا کەینە مەیدانا بەرخوەدانێ).
ل ئالیێ دی کۆنسەیا ئورۆپا پشتی کۆمبوونا خوە یا تایبەت یا ل سەر رەوشا تورکیایێ و پەنابەران راگەھاند کو ئەڤە نێزیکی ٤٠ سالانە ل تورکیا د ناڤبەرا دەولەتا تورکیا و شەرڤانێن کورد دا شەر ھەیە و ئەڤ ٤٠ سالێن دەرباز بوویی نیشا دایە کو ب شەری نەشێن چ چارەیەکی پەیدا بکەن و بۆ ڤێ چەندێ یا باش ئەوە دوبارە ڤەگەرنە سەر مێزا دانوستاندنان و پرسگرێکا کوردی ب دیالۆگێ چارە بکەن.
ھەروەسا کۆنسەیا ئورۆپا داخواز ژ پارتا کارکەرێن کوردستانێ ژی کر کو د زووترین دەم دا دەستان ژ چەکی بەردەت و راوەستاندنا شەری ل دژی تورکیا راگەھینیت، ژ بەر کو ب شەری نەشێت پرسگرێکا کوردی چارە بکەت و شەر و کوشتن زیانێ دگەھینتە گەلێ کورد و دۆزا کوردان. دیسان دڤێت دەولەت و حوکمەتا تورکیا بۆ چارەکرنا پرسگرێکا کوردی رێیا ئاشتیانە بدەتە بەر خوە و ئۆپەراسیۆنێن سەربازی بدەنە راگرتن و دەست ژ گرتنا سیاسەتمەدار و سەرۆکێن باژێرڤانیێن کوردان و ئەندامێن جڤاتێن باژێران بەردەت و وان ئازاد بکەت.
ل دووڤ ژێدەرێن ل نێزیکی ناڤەندێن شەری ل دێرسیم، ئامەد و بۆتانێ د ناڤا دو رۆژان دا د ئەنجاما شەر و پێکدادانێن د ناڤبەرا گەریلا و سەربازێن تورک دا ھژمارەک سەربازێن تورک، ھەشت پۆلیس، دو جاش ھاتینە کوشتن و چەندین گەریلا و شەش وەلاتیێن سڤیل یێن کورد ژی جانێ خوە ژ دەست داینە و ھژمارەک وەلاتی ژی بریندار بووینە.
ل دووڤ زانیاریێن گەھشتینە دەستێ مە ل بۆتانێ و دێرسمێ ئۆپەراسیۆنێن بەرفرەە یێن ئارتێشا تورکیا ل دژی گەریلایێن کورد بەردەوام دکەت و فرۆکێن شەری ژی ئەڤ چار رۆژن بەردەوام ھەرێمێن بۆتان، دێرسم و ئاخا ھەرێما کوردستانێ بۆمبەباران دکەن و دەڤەرێن شەمزینان، گەڤەر، چەلێ و لیجێ ژ ئالیێ تۆپخانایێن تورکیا ڤە دھێنە تۆپباران کرن. ھەروەسا ل ناڤەندا باژێرێ ئامەدێ، سیلڤان، لیجێ، ھێنێ، جزیرێ و گەڤەرێ ژی شەر و پێکدادان د ناڤبەرا لاوێن کورد و ھێزێن ئێمناھیێن دەولەتێ دا دژوار بوویە.
