ئەندامەکی جڤاتا پارێزگەھا دھۆکێ: بزاڤان دکەین زیان ڤێکەفتیێن بوردۆمانا تورکیا بھێنە قەرەبووکرن
ئه‌ڤرۆ نيوز:
فرۆکێن شەڕی یێن تورکیا بەردەوام دەڤەرێن سنوورێ قەزا ئامێدیێ بۆردومان دکەن، نێزیکی 10 رۆژایە گوندێ شاجا یێ سەر ب دەڤەرا نێروە و رێکان دھێتە بۆردومانکرن و گوند ھەموو ب ئاقار و رەز و بیستان ڤە ھاتیە سۆتن و سیمایەکێ رەش بخوەڤە گرتیە، ئەندانەمەکی جڤاتا پارێزگەھا دھوکێ ژی بۆ رۆژناما ئەڤرۆ دبێژیت: ئەم بەردەوام بزاڤان دکەین کو سنوورەک بۆ بۆردومانا دەڤەرێ ژ لایێ فڕۆکێن تورکیا ڤە بھێتە دانان و وەلاتیێن زیان ڤێکەفتی ژی بھێنە قەرەبووکرن.
زیاد حسێن شاجی خەلکێ گوندێ شاجا بو ئەڤرۆ گۆت: “نێزیکی 10 روژایە گوندێ مە رۆژانە ژ لایێ فڕۆکێن شەڕی یێن تورکی ڤە دھێتە بۆردومانکرن و چو کەس نوکە نەشێت قەستا گوندی بکەت، لەو ئەم دخوازین حوکمەتا ھەرێما کوردستان و عیراقێ و لایەنێن شولەژێ ب رژدی کار بکەن بۆ راوەستاندنا وان بۆردومانان، چونکی ژێدەرێ سەرەکیێ ژیان خەلکێ دەڤەرێ ئەو گوندەنە”.
رزگار سدقی، ئەندامێ جڤاتا پارێزگەھا دھوکێ بۆ ئەڤرۆ دیار کر، ژ ئەگەرێ شەڕێ بەردەوامێ د ناڤبەرا گەریلا و سۆپایێ تورکیا دا و بۆردومانکرنا دەڤەرێ ژ لایێ فڕۆکان ڤە، ژ سەرجەمێ 346 گوندێن دەڤەرا ئامێدیێ، ھەتا نوکە 198 گوند ب چولی ماینە و نەھاتینە ئاڤاکرن و گۆت: “ژ بەر بۆردومانێن بەردەوام رووبەرێن بەرفرەھێن ئەردی ھاتینە سۆتن، رەز و باغێن وەلاتیان ژ ناڤچووینە، ب ڤێ یەکێ ژی زیانێن مەزنێن گیانی و مادی گەھشتینە خەلکێ ڤان گوندان”.
رزگاری گۆتژی: “مە بەری نوکە بزاڤێن زور کرینە، بۆ وێ یەکێ ئەڤ وەلاتیێن، ژ ئەنجامێ بۆردومانا فرۆکێن تورکیا زیان گەھشتینێ، بھێنە قەرەبووکرن، مە ب رێیا کارگێریێن دەڤەرێن دھێنە توپبارانکرن، چەند ئامار ب دەست خستبوون و بۆ لایەنێن پەیوەندیدار بلند کربوون، بۆ وێ یەکێ حوکمەتا تورکیا و حکومەتا عیراقێ ژی بھێنە ئاگەھدارکرن کو ئەڤ خێزانە بھێنە قەرەبووکرن و دیار بوویە زیانێن گەھشتینە وەلاتیان دۆرێن 4 ملیار دیناران بووینە”.
وی ئەندامێ جڤاتا پارێزگەھا دھۆکێ ئاماژە ب وێ چەندێ ژی کر، ژ ئەنجامێ ڤان تۆپبارانان زیانێن گیانی ژی گەھشتینە وەلاتیێن سنوورێ قەزا ئامێدیێ و د ڤان دو سالان دا پتر ژ 10 وەلاتیێن دەڤەرێ بووینە قوربانی و گۆت: “ژ بەر ڤێ یەکێ ئەم دێ بزاڤێن رژد کەن کو قۆنسلخانا تورکیا ل ھەرێما کوردستانێ بھێتە ئاگەھدارکرن و خێزانێن وان شەھید و برینداران بھێنە قەربووکرن”.
