ئەندامەکێ جڤاتا پارێزگەھا نەینەوا: ل نیسانێ دێ ئۆپەڕاسیۆنا ئازادکرنا مووسلێ دەستپێکەت
ئەڤرۆ:
ئەندامەکێ جڤاتا پارێزگەھا نەینەوا راگەھاند، حەیدەر عەبادی سەرۆک وەزیرێن عیراقێ رێ نادەت میلیشیاتێن شیعی و (حەشد شەعبی) پشکداریێ د ئۆپەڕاسیۆنا ئازادکرنا مووسلێ دا بکەن و دیارکر، بڕیارە ل ھەیڤا نیسانا داھاتی، دەست ب ئۆپەڕاسیۆنا ئازادکرنا باژێڕێ مووسلێ بھێتەکرن و تیرۆرستێن داعشێ بھێنە ژناڤبرن و دەرکرن ژ ڤی باژێری.
غەزوان حامد، ئەندامێ کورد ل جڤاتا پارێزگەھا نەینەوا بۆ رۆژناما ئەڤرۆ گۆت” نۆکە وەزیرێن ئەمنی ( ناڤخوە و بەرگری) یێن عیراقێ دەست ب سەرەدانا بنگەھێن مەشقپێکرنا لەشکرێ خوە بەخش کریە و ژبلی پێکئینانا ھێزێن تایبەت بۆ کوردێن شەبەک و ئێزدی و کاکەیی و مەسیحیان، ھێزەکا دی ژ عەرەبێن سونە بۆ خەلکێ مووسلێ یا ھاتیە پێکئینان، بەلێ ئەو ھێزێن بۆ پێکھاتێن کوردی و مەسیحیان دێ ب سەر وەزارەتا پێشمەرگەی ڤەبن و فەرمانا سەرۆک بارزانی بۆ دەرچوویە، دەمێ ب دووماھی ئینانا مەشق و راھێنانێن لەشکری کو ژلایێ شارەزایێن ئەمریکی ب ھێزا ئازادکرنا مووسلێ دھێتەکرن، وی دەمی دێ دەست ب ئۆپەڕاسیۆنا ئازادکرنا وی باژێری ھێتەکرن، ل گۆرەی داخۆیانیێن ئەمریکا و شارەزایێن وێ، بۆ دەمێ چار ھەیڤان دێ مەشق ب ڤان ھێزان ھێتەکرن و پێشبینی دھێتەکرن ل ھەیڤا نیسانا داھاتی ئۆپەڕاسیۆنا ئازادکرنا باژێڕێ مووسلێ ژ دەستێ تیرۆرستێن داعشێ بھێتەکرن و یا دیار نینە دێ چەند ڤەکێشیت”.
غەزوانی گۆت ژی” ھێزێن ھەڤپەیمانان و پێشمەرگە دێ ھەڤکاربن بۆ کۆنترۆلکرنا باژێڕێ مووسلێ، چونکی ب زەحمەتە تنێ ئەو ھێزێن ھاتیە پێکئینان بۆ ڤێ مەرەمێ بشێن تیرۆرستان دەربکەن ژ باژێڕی و بەرھەڤیێن باش دھێنەکرن کو ھەتا بشێن ددەمێ دیاریکری دا تیرۆرستێن داعشێ ل مووسلێ بھێنە دەرکرن، لەشکرێ عیراقێ ژی دێ پشکداربیت د ئازادکرنا مووسلێ دا، بەلێ ژ بەر ھەڤڕکیا مەزھەبی، رێ ناھێتەدان چو ھێزێن میلیشیایێن وەکی (حەشد شەعبی) و شیعە پشکداربن، چونکی سەرۆک وەزیرێن عیراقێ حەیدەر عەبادی ب خوە رێ نادەت ئەو چەندا ل ھندەک دەڤەرێن عیراقێ چێبووی، ل مووسلێ دوبارە ببیت، بەلکو دێ ھێزەکا میلیشیان بۆ عەرەبێن سونە یێن مووسلێ ب ناڤێ (حەشد وەتەنی) ھێتە پێکئینان و ئەو دێ پشکداریێ د ئازادکرنا دەڤەرێن خوە دا کەن و پشتی ئازادکرنێ کۆنترۆلکەن”.
ل دۆر کوردێن شەبەک، ڤی ئەندامێ کورد یێ شەبەک د جڤاتا پارێزگەھا نەینەوا دا، گۆت” مخابن ھەر ژ دەستپێکرنا کونترۆلکرنا دەڤەرا کوردێن شەبەک ژلایێ تیرۆرستێن داعشڤە، لەشکرێ عیراقێ بەرگری نەکر و ب ڤێ ئەگەرێ ژی ١٦٠ گەنجێن کوردێن شەبەک ھاتینە رەڤاندن و پاشەرۆژا وان یا دیارنینە، ھندەک دبێژن ل ناڤ عیراقێ یێن ماین و ھندەک دبێژن داعشێ گەنجێن شەبەک یێن برینە سووریێ، ھەروەسا کوردێن شەبەکێن شیعە مەزھەب یێن ئاوارەی پارێزگەھا کەربەلا بووین و ھندەکێن دی ژی نۆکە ئاوارەنە ل ھەرێما کوردستانێ و کەمپ یێن بۆ ھاتینە ڤەکرن”.
