ئەندامەکێ سەرکرداتیا پارتی بۆ بارزانی: چاکسازیێ ژمن دەستپێبکە
ئەڤرۆ نیوز:
ئەندامەکێ سەرکردایەتیا پارتی دیموکراتی کوردستان وەکو پشتەڤانیەک بۆ چاکسازیێن سەرۆکێ ھەرێما کوردستانێ، داخواز دکەت وی چ سامان ھەبیت بکەڤیتە دبن چاڤدێریێ ڤە.
عەلی عەونی ئەندامێ سەرکردایەتیا پارتی دیموکراتی کوردستان، ل دووڤ باسنیۆز، د گۆتارەکێ دا ب ناڤێ (جەنابێ سەرۆکی .. بۆ چاکسازیێ ژمن دەستپێبکەن) دبێژیت” ھەردو بریارێن سەرۆک بارزانی ل دۆر چاکسازیێ و پاکسازیکرن دناڤ پارتی و حوکمەتێ دا و ڕێگرتن ل تالانکرنێ و گەندەلیێ، جڤاکێ کوردستانی گەلەک ب ئومێد و دلخوەشی ڤە لێ دنێڕن، ئەڤ بریارە چەند پارتیێن ڕەسەن و خەلکێ ھەژار و کەسێن دەست و دلپاک دناڤ جڤاکی دا خوەشحالکرن، ھند ژی دۆستو پشتەڤانێن کوردستانێ یێن بیانی ھیڤیدار و دلگەرم کرن”.
ب دیتنا عەلی عەونی” پشکا نەرازی و نەدلسوزێن کوردستانێ و دژە پارتی گەلەک بلەز یێن کەفتینە بەلاڤکرنا پرۆپاگندە و دلسارکرنا خەلکی، یێن مەندەھوش بووینکو سەرۆک بارزانی ب دروستی و ب وێرەکانە تبلا خوە دانا سەر برینێ و نەخوەشی دەستنیشانکری”.
ڤی ئەندامێ سەرکردایەتیا پارتی خویاکر ژی” سەرگرتنا بەرنامێ پاشەرۆژێ یێ پارتی دیموکراتی کوردستان، وەکو خودانا دۆزا کوردستانێ، ب گەش و ھێز ڤە دێ مسۆگەر کەت، بۆ وێ چەندێ سەربخوەیا کوردستانێ ڕابگەھینیت، جڤاک دێ زڤریتەڤە سەر ڕێرەوێ خوە یێ ڕاست، ئەڤ چەندە ژی پێدڤی ب میکانیزمەکا دروست و ئیرادا کادیرێن حزبی و حکومی دگەلدا بیت”.
ل دووماھیێ، عەلی عەونی، داخواز ژ سەرۆک بارزانی دکەت” ھەوێ ژ من دەستپێبکەن بۆ پەیداکرنا چاکسازیێ، ھەر چ مولک و دراڤێ من یێ قانوونی و نە قانوونی یێ ل بەر دەستێ ھەوە”.
ل ڕۆژا 10 ڤێ ھەیڤێ، مەسعود بارزانی سەرۆکێ ھەرێما کوردستانێ و سەرۆکێ پارتی، چەندین بریار بۆ چاکسازیێ دناڤ حوکمەتا ھەرێما کوردستانێ و پارتی دیموکراتی کوردستان دەرکرن.
