ئەندامەکێ سەرکردایەتیا ئێکگرتوو: پێدڤیە ھەیکەلێ حوکمەتێ بھێتە ڕێکخستن
ئەڤرۆ نیوز:
ئەندامێ پەرلەمانێ کوردستانێ ژ فراکسیۆنا ئێکگرتوو ئیسلامی، بەھزاد زێباری راگەھاند، ئەو ل گەل دەست ژ کارکێشانا پەرلەمانتاران نینم و دبیت ئەو بۆچوونا ئێک یان دوو ئەندام پەرلەمانان بیت، ژ بەر کۆ دەست ژ کارکێشان، دێ ڤالاتیەکا قانوونی یا دی ژی دروست کەت و پەرلەمانتار پشتەڤانیێ لێ ناکەن و ئاریشێن ھەرێمێ چارە ناکەت و ل وەلاتێن پێشکەفتی ھەر دەما پێتڤیا دەست ژکارکێشانێ ھەبوو، ل وی دەمی ھەلبژارتنێن پێشوەخت دھێن کرن و پەرلەمان بەردەوام دبیت ل کارێ خوە حەتا خولا نوو دھێتە پەرلەمانی، بەلێ ل ھەرێما کوردستانێ ھەلبژارتنێن پێشوەخت چارەسەری نینە .
بەھزاد زێباری بۆ رۆژناما ئەڤرۆ گوت” پشکداریا فراکسیۆنا ئێکگرتوو د کۆمبونێن پەرلەمانی دا ھەست کرنە ب بەرپرسیاریەتێ ھەمبەری ھاوڵاتی و فەرمانبەران, کۆ پێدڤیە پەرلەمانی ژی ڕولێ خوە ھەبیت د چارەسەرکرنا ئاریشان دا و چاڤدێریا دەستھەڵاتا جێبەجێ کرنێ بکەت و ئەم د حوکمەتێ دا بین یان ژی نە، پێدڤیە پەرلەمان ھەر یێ کارا بیت و زێدەتر نەبیتە قوربانی ناکۆکیێن سیاسی” .
ئەندامێ سەرکردایەتیا ئێکگرتوویا ئیسلامی ھێشتا گۆت” نابیت حوکمەت ل شوونا پەرلەمانی بریاران بدەت و دڤێت ڕۆلێ پەرلەمانی یێ ئەکتیڤ بیت بۆ ئەنجامدانا ھەر چاکسازیەکێ، راستە دەم پێدڤێت بۆ چارەسەکرنا ئاریشێن سیاسی، لێ ژ بەر بەرژەوەندیا گشتی، پێدڤیە بھێنە چارەسەرکرن”.
خویاکر ژی کۆ ل ساڵا 2016 دێ بارێ ئابووری یێ ھەرێما کوردستانێ زورێ گران بیت ل سەر حوکمەتێ و ل سەر ھاوڵاتیان ب تایبەتی، ھەکە بھایێن پەترۆلێ ل بازارێن جیھانی ب ڤی شێوەی بیت و چاکسازیێن حوکمەتێ تا نھا ب تنێ گۆتنە و پێدڤیە ئەڤ چاکسازیە بھێنە بەرفرەھکرن و موچێن پلێن تایبەت بھێنە کێمکرن و چاکسازی کەرتێ پەترۆلێ ژی ڤەگریت و موچەخورێن بن دیوار نەمینن و پێداچوون د گرێبەستێن پەترۆلێ دا بھێتە کرن ل گەل کۆمپانیێن نەحکومی و کۆمپانیی ژی نە ھێنە ئازادکرن ژ دانا باجان و پێدیڤە ھەیکەلێ حوکمەتێ بھێتە ڕێکخستن کۆ ھژمارا وەزارەتان و دەستە و ڕێڤەبەریان بھێتە کێمکرن.