ئەندامەکێ مەکتەبا سیاسی یا ئێکگرتوو: بارزانی یێ رۆلێ سەرکردەکێ نەتەوەیی دگێریت
ئەڤرۆ نیوز:
ئەندامەکێ مەکتەبا سیاسی یا ئێکگرتوویا ئیسلامی یا کوردستانێ دیار دکەت کو نوکە خوەش دەلیڤەیە سەربەخۆیا کوردستانێ بھێتە راگەھاند و سەرۆک بارزانی ب سەرکردەکێ نەتەوەیی ناڤ دکەت.
ئەبوبەکر عەلی ئەندامێ مەکتەبا سیاسی یا ئێکگرتوویا ئیسلامی یا کوردستانێ بۆ رۆژناما ئەڤرۆ گۆت: نوکە باشترین دەلیڤا مێژوویی یە ئەو خەونا ھەر کەسەکێ کورد پێڤە دیت کو دەولەتا کوردستانێ بھێتە راگەھاندن و ھەر ھەموو بنەمایێن دەولەت بوونێ ھەنە و بتنێ مایە ناڤ مالا کوردی پتر بھێتە رێکخستن، نوکە دەولەت بوون بوویە ئارمانجەکا واقعی و نەخشە رێکەک بھێتە دیتن بۆ ڤەگوھاستنێ.
ئەبو بەکەر عەلی گۆت: ھەموو بنەمایێن سەربەخۆیێ ل جەم مللەتێ کورد ھەنە و دیسان کاودان ھاریکارن بەر ب دەولەت بوونێ بچیت و دیسان گوھۆرینێن دەڤەرێ پەیدا بن ھاریکارن و بتنێ مە پێدڤی ب ئێکرێزیێ ھەیە دڤێ قوناغێ دا، بتنێ خالا لاواز ئەوە پەیوەندیێن پارتێن سیاسی ل کوردستانێ نەھاریکارن و دیسان کاودانێن پەرلەمانێ کوردستانێ و پێدڤی یە ئەڤە ژی بھێنە چارەسەکرن ب مەرەما راگەھاندنا دەولەتا کوردستانێ و ھەکە دەرفەت پەیدابوو نابیت ئەڤ کاودانە ببنە رێکگر ھەمبەر ڤێ خەونا مللەتێ کورد.
ب رازیبوونا تورکیا راگەھاند تورکیا دێ ب ساناھی بیت و شەمەندەفرا دەولەتا کوردستانێ دێ ل ئەنقەرە و سەنتبولێ دا دەربازبیت، تورکیا بوونا دەولەتا کوردستانێَ قەبوولە و ئەڤە دبەرژوەندیا تورکیا دایە تورکیا بھێتە ئاڤاکرن، دبینم دێ تورکیا وەلاتەکێ ھاریکار و پشتەڤان بیت بۆ دەولەتا کوردی و بتنێ دڤێت ئەم ناڤ مالا خوە رێکبێخین، دەولەتا کوردستانێ ل بەردەرگەھی یە و ئەگەر مەبفێت و ئەم ئێک بین دماوێ شەش ھەیڤێن بھێت دا ھەتا سێ سالان دێ بینە خودان دەولەتا سەربەخۆ و تورکیا دێ ژوانێن ھەرە بھێز بیت بۆ پشتەڤانیا دەولەتا کوردستانێ.
ئەبوبەکر کاروانی زێدەتر ژی گۆت: ب (ئەمرێ واقع) ب خوینا شەھیدان و ب ھێزا پێشمەرگێ کوردستانێ نوکە پتریا سنورێن ھەرێما کوردستانێ ھاتینەدەست نیشانکرن و ھاتینە دیارکرن، نابینم کورد ئێدی تووشی چ کارەساتێن مەزن بن چونکە کاودان ھاریکارن و خەلک ھاتینە گۆھورین و کوردان ژی رۆلێ خوە ھەیە وەکی بەرێ نەماینە و ئێدی کارەساتێن مەزن بەر ب نەمانێ دچن، لێ بتنێ مەترسی ئەوە نە ئێکبوونا مە ڤێ دەرفەتێ ژ دەستێ مە بکەت.
ھەمبەر ھەلویستێ سەرۆک بارزانی ژی، ھەمان ئەندامێ مەکتەبا سیاسی یا ئێکگرتوو گۆت: بارزانی دو رۆلێن گرنگ ل دەڤەرێ دگرێیت، ل دەرڤە وەک سەرکردەکێ نەتەوا مللەتێ کورد دھێتە دیتن و رۆلەکێ مەزن ھەیە، نافخوە ژی دا دڤێت بارزانی کار بکەت ئێکگرتنەکا نەتەوەیی دناڤبەرا پارتێن سیاسی دا پەیدا بکەت و نێزیکی ئێک بکەت ل سەر چێبوونا دەولەتا کوردی و دیسان چارەسەرکرنا کێشێن نافخوە و ئارام کرنا کاودانێن نوکە مللەتێ کورد کەفتیە تێدا.
ھەمان ئەندامێ مەکتەبا سیاسی یا ئێکگرتوویا ئیسلامی یا کوردستانێ گۆتژی: بدیتنا من پێدڤی یە کوردستان بکەڤیتە دقوناغەکا ڤەگوھاستنێ دا بۆ ماوێ دو سالان و ئەڤە نەخشە رێیە بۆ سەربەخۆیا کوردستانێ بۆ بھێزکرنا قوناغا دیموکراسی و باشتر ل کوردستانێ و دیسان رێکەفتن ل سەر پرۆژەکێ نشتیمانی و بھێز بۆ ئایندەکێ گ ل دەرڤە، پشتی ئەڤان دو سالان ھەلبژارتنێن پاقژ ل کوردستانێ بھێنەکرن ل سەر بنیاتەکێ موودن و ساخلەم.
