ئەنفالکری دخوازن گوند و وارێن وان بھێنە قەرەبوووکرن
ئه‌ڤرۆ نيوز:
ئەو خەلکێ ل سالا ١٩٨٨ کەفتیە بەر ھێرشێن دوژمنێن مرۆڤایەتیێ و بریارا ئەنفالکرنێ بۆ ھاتیەدان و گوند و وارێن وان ھاتینە سۆتن و ئاوارەی وەلاتێ تورکیا بووین و ل کەمپێن مێردینێ و دیاربەکرێ و مۆشێ بۆ ماوێ چار سالان ئاکنجی بووین، دخوازن ژ لایێ حوکمەتا ھەرێمێ ڤە بھێنە قەرەبووکرن، رژێما ژ ناڤچوویا بەعس ل ٢٨ تەباخا سالا ١٩٨٨ بریارا ئەنفالکرنا دەڤەرا بادینان دا و د ئەنجام دا ب سەدان ھزار وەلاتیێن کورد ژ لایێ رژێما بەعسا ژ ناڤچوویی ھاتنە کۆشتن و بەرزەکرن.
زانا ئەحمەد وەک وەلاتیەکێ ئەنفالکری ل سالا ١٩٨٨ بۆ ئەڤرۆ دبێژیت: ئەڤە ٢٧ سال بۆرین ل سەر ئەنفالکرنا مە، لێ ھێشتا چو بۆ مە نەھاتیە کرن و ئەم ھاتینە ژبیرکرن، ھەر چەندە گەلەک جاران حوکمەتا ھەرێمێ سۆز دا بوو ئەنفالکریێن سالا ١٩٨٨ بھێنە قەرەبووکرن، لێ ھەتا نوکە ئەم نەھاتینە قەرەبووکرن، ژ بەر کو دەمێ ئەم ئاوارەی تورکیا بووین، مە ھەموو تشت و مال و مولکێ خوە ژ دەست دابوو، ب تنێ مە گیانێ خوە و زارۆیێن خوە قورتالکر، ئەو رۆژ وەکی رۆژێن حەشرێ بوون ل بەر چاڤێن مە و ئەم تووشی دەردەسەریەکا مەزن بووین، کەسێ ئاگەە ژ حالێ مە نەبوو، چو جاران ئەو رۆژ ژ بەر چاڤێن مە ناچن.
ھەروەسا گوت ژی: د وان کەمپان دا مە ژیانەکا گەلەک نەخۆش د بۆراند و حوکمەتا تورکیا ھەموو رەنگێن زۆریێ و دژایەتیکرنێ بەرامبەر مە بکاردئینان، ھەروەسا نانێ ژەھرکری دا خەلکێ کەمپێ و چەندین کارەسات ب سەرێ مە ئینان.
ناڤھاتی خویاکر ژی: گەلەک نەخۆشی و ئێش و ئازار د ماوێ چار سالان دا ل بن چادران ل کەمپا مێردینێ مە بۆراندن، حوکمەتا تورکیا ژی ب رەنگەکێ ئاشکەرا دژایەتیا مە دکر و نە دھێلا خەلک ژ کەمپێ دەرکەڤیت و نەبوونا پێدڤیێن ژیانێ گەلەک ئاستەنگی بۆ مە چێکربوون، لێ ھەر مە خوە راگرت و مە دەست نە داھێلان، لەورا نوکە ژ حوکمەتا ھەرێمێ دخوازین مە قەرەبوو بکەت، ھەر چەندە دەمەکێ زۆر بۆریە، لێ ئەم ڤێ چەندێ ب مافەکێ خوە سرۆشتی دبینین و پێدڤیە ھەر مە قەربو بکەت، ژ بەر کو گەلەک ژ وان خێزانێن ئەنفالکری ھەتا نوکە ژی رەوشا وان یا ئابووری یا لاوازە و ژیانەکا نەخۆش دبۆرینن.
مەحمود فەتاح وەلاتیەکێ دی یێ ئەنفالکریە دبێژیت: ئەنفال ئەو کارەسات بوو یا عەرشێ سەدامێ دکتاتۆر ھەژاندی و ژبن بری، ژ بەر کو ئەو خەلکێ قورتال بوویی و ب تایبەتی ئەوێن ل کەمپا پەنابەریێ ل تورکیا، بوونە ھێڤێنێ سەرکەفتنا مللەتێ کورد، چونکو بۆ جارا ئێکێ بوو کێشا کوردی ھاتیە ڤەگوھاستن بۆ بلندترین ئاستێ جیھانێ کو ئەو ژی ئەنجومەنێ ئاسایشا نێڤدەولەتی بوویە، ژ بەر کو پشتی چەکێ کێمیاوی ھاتیە بکارئینان ل دەڤەرا بادینان و ب تایبەتی ل بارەگایێن پێشمەرگەی و گوندێن ئازادکریێن دەڤەرێ کو بەری ھینگێ ژی رژێما بەعس چەک ل دژی خەلکێ ھەلەبچە بکارئینابوو.
گوت ژی: لەورا باوەری بۆ دەولەتێن زلھێز و نەتەوێن ئێکگرتی پەیدابوو کو گۆمان تێدا نینە رژێما بەعسا سەدامی چەکێ کێمیاوی دژی کوردان بکارئینایە، دیسان ھەر ئەڤ خەلکە بۆ ئەگەرا ھندێ کو پشتی سەرھلدانێ ژی ئەنجۆمەنێ ئاسایشا نێڤدەولەتی بریارا ٦٨٨ بدەت و دەڤەرەکا ئارام بۆ خەلکێ کوردستانێ دروست بکەت، لێ مخابن حوکمەتا ھەرێما کوردستانێ وەکو پێدڤی خزمەتا ڤی خەلکی نەکریە، ب تایبەتی ئەوێن دەربەدەری تورکیا بووین، بەروڤاژی خزمەتەک باشتر و بەرچاڤتر بۆ ئاوارەیێن ئیرانێ کریە ژ لایێ ماددی و مەعنەوی ڤە.
ناڤھاتی خویاکر ژی: ھەر چەندە بەری دو سالان ب خێرا پەنابەرێن ژ ئیرانێ ڤەگەریاین قەرەبووویا چەندەک ژ ڤەگەریایێن تورکیا ژی ھاتیە کرن، لێ بەشێ ھەرە زۆر ژێ ماینە ھەتا نوکە نەھاتینە قەرەبووکرن، حوکمەتا ھەرێمێ ژی ھەتا نوکە خوە بێدەنگ کریە، لەورا داخواز دکەین ئەوێن ل رۆژێن گران بووینە سۆتەمەنیێ ئاگرێ شۆرەشا گۆلانێ و ب ھەمو رەنگان خزمەتا پێشمەرگەی و شۆرشێ کرین ژبیر نەکەن، لەورا ب فەر دبینین ھەر دەما رەوشا ئابووری یا ھەرێمێ باش بیت ڤە قەرەبوویا ڤان مالبات و کەس و کار و قوربانیێن ئەنفالێ ژی بھێتە کرن.
