ئەوقاف دێ پێداچوونێ د پێشنڤێژ و گۆتاربێژێن مزگەفتان دا کەت
ئه‌ڤرۆ نيوز:
وەزارەتا ئەوقاف و کاروبارێن ئاینی دست ب رێکخستنا میلاکێ وەزارەتێ کریە و ھندەک مامۆستایێن ئاینی دێ ھێنە گوھۆڕین، بەرپرسێ پەیوەندیێن وەزارەتێ ژی ئاماژێ ب وێ چەندێ دکەت ھەر کەسێ مزگەفتەکێ ل سەر ئەرکێ خوە ژی ئاڤا کەت دڤێت دووماھیێ رادەستی وەزارەتێ بکەت.
بەپرسێ پەیوەندیێن وەزارەتا ئەوقاف و کاروبارێن ئاینی ل حوکمەتا ھەرێما کوردستانێ مەریوان نەقشبەندی بۆ رۆژناما ئەڤرۆ گۆت وەزارەتا ئەوقافێ دەست ب چاکسازی و رێکخستنەڤا مامۆستایێن ئاینی کریە، چ وەکو پێشنڤێژ یان گۆتاربێژێن مزگەفتان، چونکو سالێن بۆری ھندەک مامۆستایێن ئاینی ب دەلیڤە زانیە کارێ خوە بۆ بەرژەوەندیێن خوە بکاربینن.
مەریوان نەقشبەندی ھەروەسا گۆت ھندەک مزگەفتان مۆلەتا گۆتار خواندنێ نینە، بەلێ مامۆستایێن ئاینی ل سەر میلاکێ ڤان مزگەفتان ھاتیە دامەزراندن و خوە ژبیرکرینە فەرمانبەرێن وەزارەتێ نە، یان ھندەک مزگەفتێن د ناڤ تاخێن پیشەسازی و بازاڕ و جھێن گشتی دا زۆر د بچووکن و گۆتارا ئەینیێ تێدا ناھێتە خواندن وان ژی گۆتاربێژ یێن ھەین.
نەقشبەندی گۆت ژی ل ھەرێما کوردستانێ مزگەفت گرێدایی وەزارەتا ئەوقافێ نە و دڤێت پێگیری رێنمایی و بڕیارێن حوکمەتێ بن، ھەر کەسەکێ مزگەفتەکێ ئاڤا دکەت، ئەگەر ئەردێ مزگەفتێ یێ وی کەسی بیت و ل سەر پارێ خوە ژی ئاڤا بکەت، پشتی تمام بوونێ دڤێت وێ مزگەفتێ رادەستی وەزارەتێ بکەت و نابیت ب حەزا خوە مامۆستایەکێ ئاینی بۆ دیار بکەت و رەفتارێ تێدا بکەت، لەوڕ نوکە یا دھێتە رێکخستن، ھندەک مزگەفتێن بچووک پێشنێڤژ یێن ھەین و بەروڤاژی ھندەکێن مەزن کو خەلکەکێ زۆر د چیتێ چو پێشنڤێژ لێ نینن.