ئەوێن تاوان دژی ئێزدییان كرین لێبۆرینا گشتی ژێ ناگریت
ئەندامەكێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان راگەهاند: ئەوێن دەستێن وان ب خوونا ئێزدییان د سوور و پشكداری د كۆمكۆژییا ئێزدییاندا كری، لێبۆرینا گشتی ژێ ناگریت.
مەحما خەلیل، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان گۆت» پشتی مە سەرەدانا دادگەها فیدرالی كری بۆمە هاتە دیاركرن كو قانوونا لێبۆرینا گشتی ژوان كەسان ناگریت یێن دەستێن وان ب خوونا ئێزدییان د سوور و پشكداری د كۆمكۆژییا ئێزدیاندا كری».
ل 21/1/2025، جڤاتا نوونەرێن ئیراقێ ب گۆڕەی بەرنامەیێ كارێ خوە د بڕگەیا سیێ دا دەنگ ل سەر پڕۆژەیێ قانوونا راستڤەكرنا دویێ یا لێبۆرینا گشتی هەژمار (27) یا سالا 2016 هاتە دان.
هەتا نوكە زێدەتر ژ دو هزار و 500 ئێزدی د بێسەروشوینن و چەندین گۆڕێن ب كۆم ژی هەتا نوكە نەهاتە هەلكۆلان، سەرەرای وێ چەندێ زێدەتر ژ 200 هزار هەڤوەلاتیێن ئێزدی د ناڤ كەمپاندا دژین.
