ئەڤرۆ ئەنجومەنێ وەزیرێن ھەرێمێ دێ کۆمبیت
ئەڤرۆ نيوز:
ئەنجومەنێ وەزیرێن ھەرێما کوردستانێ ئەڤرۆ رۆژا 8-11-2016ێ دێ کۆمبیت و وەزیرەکی ژی بەرنامێ کۆمبوونێ ئاشکرا کر کو د کۆمبوونێ دا دێ دانوستاندن ل سەر چار تەوەران ھێتەکرن و ئامادەکاریێن وەزارەتا دارایی و ئابووری یا حوکمەتا ھەرێما کوردستانێ بۆ بەلاڤکرنا مووچەی دێ ھێنە بەرچاڤکرن.
عەبدولستار مەجید، وەزیرێ چاندن و ژێدەرێن ئاڤێ یێ حوکمەتا ھەرێما کوردستانێ دیار کر کو بڕیارە ئەڤرۆ رۆژا 8-11-2016ێ ئەنجومەنێ وەزیران ل دەمژمێر 11:30ی سپێدێ کۆمبیت و د کۆمبوونێ دا دانوستاندن دێ ل سەر چەند قرسان ھێتەکرن و گۆت: “د تەوەرەکێ کۆمبوونێ دا وەکو وەزارەتا چاندن و ژێدەرێن ئاڤێ ئەز دێ راپۆرتەکێ خوینم ل دۆر کار و چالاکیێن مە یێن دو سالێن بۆری کا بەرھەم چەند ھاتیە زێدەکرن و ئاریشێن دکەڤنە د رێیا کاری دا چنە و ھتد..”.
ناڤھاتی خویا کر کو د لایەکێ دی یێ کۆمبوونێ دا راپۆرتەک دێ ژ لایێ وەزارەتا پێشمەرگەی ڤە ھێتە بەرچاڤکرن ل دۆر ئاسایشا ھەرێما کوردستانێ و شەڕێ دژی تیرۆرستێن داعش و گۆت: “د تەوەرەکێ دی یێ کۆمبوونێ دا راپۆرتەک دێ ژ لایێ بریکارێ وەزارەتا دارایی و ئابووری یا حوکمەتا ھەرێما کوردستانێ ڤە ل دۆر رەوشا دارایی و ئابووری و بابەتێ داھات و مەزاختێن گشتی و پلان و ئامادەکاریێن وەزارەتێ بۆ دابینکرنا مووچەی و مەزاختیێن گشتی ھێتە بەرچاڤکرن”.
