ئەڤرۆ جڤاتا وەزیرێن ھەرێمێ ل دۆر بودجا 2017 دێ کۆم بیت

ئه‌ڤرۆ نيوز:
بڕیارە ئەڤرۆ 21ى شوباتا2017ێ سەرۆکایەتیا جڤاتا وەزیرێن ھەرێما کوردستانێ ل دۆر بودجا گشتی یا ھەرێما کوردستانێ بۆ سالا 2017ێ و ئاڤاکرنا ھژمارەکا قوتابخانە و نەخۆشخانان کۆم ببیت، بەرپرسێ فەرمانگەھا دووڤچوون و ھەماھەنگیێ ل سەرۆکایەتیا جڤاتا وەزیران ژی دبێژیت: راپۆرتا وەزارەتا کاروبارێن شەھید و ئەنفالکریان ژی دێ ھێتە بەحسکرن.
دکتۆر نوری عوسمان، بەرپرسێ فەرمانگەھا دووڤچوون و ھەماھەنگیێ ل سەرۆکایەتیا جڤاتا وەزیرێن ھەرێما کوردستانێ بۆ رۆژناما ئەڤرۆ خویا کر، بڕیارە ئەڤرۆ رۆژا سێشەمبی سەرۆکایەتیا جڤاتا وەزیرێن ھەرێما کوردستانێ کۆمبوونا ئاسایی یا جڤاتا وەزیرێن ھەرێما کوردستانێ یە و گۆت: “بڕیارە د کۆمبوونێ دا چەند مژارەک بھێنە بەحسکرن، ژ وانا پرسا بودجە و داھاتێ حوکمەتا ھەرێما کوردستانێ بۆ ئەڤ سالە، ھەروەسا سەرەدانا شاندێن حوکمەتا ھەرێمێ بۆ چەند وەلاتەکێن بیانی و پێشکێشکرنا چەند خزمەتگوزاریەکان ژ لایێ وەلاتێن بیانی ڤە، مینا: ئاڤاکرنا ھژمارەکا ئاڤاھیێن قوتابخانە و نەخۆشخانان”.
دکتۆر نووری عوسمانی دیار ژی کر، ھەر د کۆمبوونا ئەڤرۆ یا سەرۆکایەتیا جڤاتا وەزیرێن ھەرێما کوردستانێ دا دێ دانوستان ل دۆر راپۆرتا وەزارەتا کاروبارێن شەھید و ئەنفالکریان یا ل دۆر کێمکرنا ھەیکەلێ وەزارەتێ د چارچوڤێ پێداچوون ب مەزاختیێن وەزارەتا شەھید و ئەنفالکریان دا ھێتەکرن.

کۆمێنتا تە