ئەڤرۆ دێ ھووردەکاریێن کوشتنا رێڤەبەرێ بەرێ یێ پۆلیسێن ھەولێرێ ھێنە ئاشکراکرن
ئه‌ڤرۆ نيوز:
پەیڤدارێ پۆلیسێن پارێزگەھا ھەولێرێ بۆ رۆژناما ئەڤرۆ دیار کر پشتی کو بەری دو حەفتیان رێڤەبەرێ بەرێ یێ پۆلیسێن ھەولێرێ د روودانەکێ دا جانێ خوە ژ دەست دا، بڕیارە ئەڤرۆ ھووردەکاریێن وێ روودانێ بھێتە ئاشکراکرن.
موقەدەم کاروان خۆشناو، پەیڤدارێ پۆلیسێن پارێزگەھا ھەولێرێ گۆت”بەری دو حەفتیان لیوا جەمال سیساوەیی رێڤەبەرێ بەرێ ییێ پۆلیسێن ھەولێرێ ب ئەگەرێ روودانەکێ جانێ خوە ژ دەست دا، بەلێ پشتی دووڤچوونەکا ھوور بۆ ھاتیەکرن تۆمەتبار ھاتیە ئاشکراکرن و بڕیارە بەری نیڤرۆیا ئەڤرۆ رۆژا ئێک شەمبی د کۆنگرەیەکێ رۆژنانەڤانی دا ھووردەکاریێن کوشتنا رێڤەبەرێ پۆلیسان بھێتە ئاشکراکرن”.
پەیڤدارێ پۆلیسێن پارێزگەھا ھەولێرێ خویا ژی کر کو د دەمێ حەفیتەکێ دا شەش وەلاتی ل سنوورێ پارێزگەھا ھەولێرێ ب ئەگەرێ ئاریشێن جڤاکی ھاتینە کوشتن، کو روودانەک ل تاخێ سەربەستی بوویە و وەلاتیەکی تولا برایێ خوە ڤەکریە و رابوویە ب رەڤاندنا کەسەکی و پشتی ھنگی کوشتیە و گۆت “وەلاتیێ ھاتیە کوشتن قوتابیێ خواندنا بلند بوویە ل وەلاتێ رۆسیا و ب سەرەدان ڤەگەڕیابەە”.
ھەروەسا موقەدەم کاروان خۆشناو گۆت “ل تاخێ سەرکارێز ژی وەلاتیەکی ل سەر ئاریشەیەکا جڤاکی خەسیا خوە کوشتیە و پشتی ھینگی تەقە ل برایێ خێزانا خوە کریە و ئەو ژی کوشتیە”.