ئەڤرۆ نيوز راپۆرتا جڤاتا قەزا شنگالێ بۆ پەرلەمانێ کوردستانێ ھنارتی ئاشکرا دکەت
ئەڤرۆ:
رێڤەبەرێ ناحیا سنۆنێ بۆ ئەڤرۆ دیارکرکو جڤاتا قەزا شنگالێ و جڤاتا سنۆنێ راپۆرتەکا پێکھاتی ژ ١٤ خالان پێشکێشی پەرلەمانێ کوردستانێ دکەت و تێدا داخواز دکەن شنگال ب ھەموو دەڤەرێن خوە ڤە ب ئێکجاری ڤەگەریت بۆ ب سەر ھەرێما کوردستانێ ڤە و پەرلەمانێ کاربکەت رەوشەنبیریا وەلاتیبوونێ و لێبورینێ و پێکڤەژیانێ دناڤ پرۆگرامێن خواندنێ دا بھێنە چەسپاندن.
نایف سەیدو رێڤەبەرێ ناحیا سنۆنێ بۆ ئەڤرۆ گوت”چونکو پەرلەمانێ کوردستانێ دەزگەھەکێ شەرعی یێ خەلکێ مەیە، ئەم داخوازێ ژێ دکەین بریارێ بدەت قەزا شنگالێ بھێتە ب سەر ھەرێمێ ڤە و ئێدی خوە ل ھێڤیا بجھئینانا مادێ ١٤٠ نەگرن”.
نایف سەیدۆ دیارکر کو راپۆرتا وان پێکھاتیە ژ ١٤ خالان ژ وان ژی کارەساتا شنگالێ ل سەر ئاستی نێڤدەولەتی بھێتە ناساندن و ھێزێن پێشمەرگەی ب چەکێن قورس سنۆرین دەڤەرێ بپارێزن داکو ئێدی چو مەترسی ل سەر ژیانا وەلاتیان نەمینیت و دەڤەرا شنگالێ ب ئێکجاری ڤەگەریت بۆ ب سەر کوردستانێ ڤە و حوکمەتا عێراقی مایتێکرنێ نەکەت و بودجەکا تایبەت بۆ ئاڤاکرنا شنگالێ بھێتە تەرخانکرن ولژنەک تایبەت ژی بۆ ھەلسەنگاندن و دەستنیشانکرنا زیانێن گەھشتینە وەلاتیان بھێتە پێکئینان و خەلکێ شنگالێ بھێتە قەرەبووکرن.
نایفی گوت ژی” ھنارتنا تیمێن ئەندازیاری بۆ ڕاکرنا مین و تەقەمەنیان و دانا دەلیڤێن کاری بۆ خەلکێ دەڤەرێ کو رێژا ھەژاریێ ل ھەموو کوردستانێ ب تنێ ل دەڤەرا شنگالێ یا زێدەیە و سزادانا ھەر کەسەکێ دەست د تاوانا شنگالێ دا ھەی ژ وان داخوازیان بوون”.
ئاماژە دا کو ئێک ژ داخوازیان، ھەر ل باغچێن ساڤا وھەتا زانکۆیی رەوشەنبیریا وەلاتیبوونێ ولێبورینێ وپێکڤەژیانێ د ناڤبەرا ھەموو ئایین ونەتەوێن ھەرێمێ دا بھێتە چەسپاندن دناڤ پرۆگرامێن خواندنێ دا وئەو تێکستێن دبنە ئەگەرێن توند وتیژیێ ھەموو بھێنە دوورخستن و پەرلەمان کار بکەت بۆ پارێزگەھبوونا شنگالێ و نڤیسینگەھەک تایبەت ب جینۆسایدێ ل دەڤەرا شنگالێ بھێتە ڤەکرن.
