ئەڤرۆ وەزیرێ پەروەدێ ل دۆر شاشیێن ئەزموونان دێ چیتە پەرلەمانی
ئه‌ڤرۆ نيوز:
بڕیارە ئەڤرۆ لیژنا پەروەردێ و خواندنا بلند ل پەرلەمانێ کوردستانێ دگەل وەزیرێ پەروەردێ و بەرپرسێن وەزارەتێ ل دۆر ئاریشێن قوتابیان کۆم ببن و پەرلەمانتارەک ژی دبێژیت “کۆمبوون دێ یا تایبەت بیت ب ڤان شاشیێن د ئەزموونێن دوماھیا سالێ ھاتینەکرن”.
دکتۆر شێرکۆ ئەمین، ئەندامێ لیژنا پەروەردە و خواندنا بلند یا پەرلەمانێ کوردستانێ بۆ رۆژناما ئەڤرۆ گۆت “بڕیارە ئەڤرۆ رۆژا سێشەمبی، وەزیرێ پەروەردێ و رێڤەبەرێ گشتیێ ئەزموونان ل وەزارەتێ و رێڤەبەرێ گشتیێ کۆنتڕۆلێ سەرەدانا پەرلەمانی بکەن و دگەل لیژنا پەروەردە و خواندنا بلند کۆم ببن، بێگومان کۆمبوون دێ ل دۆر ئاریشە و گازندێن قوتابیان بیت، چونکو ھندەک شاشی د رێڤەچوونا ئەزموونان دا ھەبوون و قوتابی گازندا ژ وەزارەتێ دکەن”.
دکتۆر شێرکۆی گۆت ژی “بەری نوکە وەزارەتا پەروەردێ ھندەک ژ وان ئاریشەیان چارەسەر کربوون، بەلێ ھندەک ژی ماینە و دڤێت بھێنە چارەسەرکرن، بۆ نموونە گۆرەی دووڤچوونا لیژنا پەروەدێ د ئەزموونێن دوماھیێ یێن پۆلا نەھێ بنەڕەتی و دوازدەی ئامادەیی دا، ھندەک پرسیاران دو بەرسیڤێن راست ھەبوون، د دەمێ وەرگێڕانێ د ناڤبەرا بەھدینی و سۆرانیێ دا جوداھی ھەبوو، ھەروەسا زۆر ئاریشێن دی ھەبوون، لەوڕا لیژنا پەروەدێ دێ ب ھووری بەحس کەت و نابیت ل سالێن داھاتی یێن خواندنێ ئەڤ شاشیە دوبارە ببن و مافێ قوتابیان بھێتە خوارن، د ھەمان دەم دا پەروەردێ ھندەک شاشی چارەسەر کربوون بەری مافێ قوتابیان بھێتە خوارن”.
