ئەڤرۆ پارتی دێ ئاھەنگەکا مەزن بۆ پشتەڤانیا لیستا 183 ل دھۆکێ گێڕیت
ئه‌ڤرۆ نيوز:
ب بەرھەڤبوونا سەرۆک (مەسعود بارزانی) سەرۆکێ پارتیا دیموکراتا کوردستانێ، ئەڤرۆ 27/9/2018 ل دەمژمێر چاری ئێڤاری ل یاریگەھا یانا دھۆک یا وەرزشی، پارتی دێ ئاھەنگەکا جەماوەری یا مەزن بۆ پشتەڤانیکرنا لیستا 183 یا پارتی و بەربژارێن وێ گێڕیت.
مەسعود سەرنی، کارگێرێ لقێ ئێکێ پارتی دیموکراتی کوردستان و بەرپرسێ نڤسینگەھا رەوشەنبیری و جەماوەری بۆ رۆژناما ئەڤرۆ ئاشکرا کر، ئەڤ ئاھەنگە ب مەرەما پشتەڤانیکرن و سەرخستنا لیستا 183 یا پارتی و بەربژارێن وێ بۆ ھەلبژارتنێن پەرلەمانێ کوردستانێ دێ ھێتە گێڕان و گۆت: “ئەم پێشبینی دکەین نێزیکی 30 ھزار کەسان بەرھەڤی ڤێ ئاھەنگێ ببن، دیسا ل دەمژمێر چار خەلک دێ کۆمڤە بن و ل دەمژمێر شەش دێ ئاھەنگ دەست پێ کەت”.
مەسعود سەرنی ئاماژە ب وێ چەندێ ژی کر، سەرۆک مەسعود بارزانی دێ پەیڤەکێ د ڤێ ئاھەنگێ دا پێشکێش کەت، پاشی دێ برگێن ھۆنەری دەست پێ کەن ب پشکداربوونا چەندین سترانبێژێن دەنگ خوەش، وەکو (حەسەن شەریف، کاروان کامل، دیلان، مەلیت بەرجەل) دیسا ھەلبەستڤانێ مەزنێ کورد (موئەیەد تەیب) ژی دێ ھەلبەستەکێ پێشکێش کەت.
