ئەڤرۆ پانێلێ رۆلێ موزیکێ د سینەما کوردی دا هاتە پێشکێش کرن
ئەڤرۆ نیوز ، زنار تۆڤی:
ئەڤرۆ ئێکشەمبیێ 15 ئیلۆنا 2019 ل دەمژمێر 11 سپێدێ ب بەرهەڤبوونا چەندین هونەرمەند و سینەماکار و موزیکژەنێن کورد پانێلێ رۆلێ موزیکێ د سینەما کوردی دا ل هۆلا کۆنفرانسان هاتە پێشکێشکرن.
پانێلێ ژ ئالیێ دەرهێنەر محەمەد جانۆی ڤە هاتە برێڤە برن.
ل دەستپێکێ دەرهێنەر و سینەماکار حسێن حەسەنی گۆت: هەتا رادەکێ کورد یێن شیاین موزیکێ بۆ فلمێن کوردی دانن، لێ نە ب رەنگەکێ باش، لەوما دڤێت ئەم پتر گرنگیێ ب ڤی واری بدەین، باشترین موزیکژەنێ کورد د ڤی واری دا نیزامەدین ئارنج ە، کو ناڤهاتی چەندین جاران پشکداری د فلمە فیستەڤالا دهۆکێ دا کریە.
ئەڤین حسێن بەرپرسا سەندیکا هونەرمەندان لقێ دهۆک دیار کر: هەکە ئەم سەحکەینە دراما هەر فلمەکێ، دەمێ فلمەک دهێتە چێکرن، دڤێت دەرهێنەر موزیکێ لدووڤ سیناریۆیێ چێکەت، دڤێت گونجاندن تێدا هەبیت، هەروەسا چێکرنا موزیکێ کارەکێ تایبەت نینە، نە مەرجە ئەو کەسێ موزیکێ بۆ فلمی دانیت یێ ئەکادیمی بیت، لێ دبیت بەکرەوەندەکێ موزیکی هەبیت، دیسان مە ل کوردستانێ ئەڤ بسپۆریە نینە، ئەڤە وارەکێ ب زەحمەتە.
گۆت ژی: دڤێت ئەم موزیکا کوردی تێکەلی موزیکا کلاسیک یا کوردی بکەین و ل سەر وی بنەمای موزیکێ بۆ فلمان چێکەین و دڤێت ئامیرێن کوردی دناڤ موزیکێن فلمێن کوردی دا بهێنە بکارئینان.
سینەماکار ئیبراهیم سەلمان د وی پانێلی دا گۆت: چێکرنا فلمان تشتەکێ پێکڤەیە، دڤێت کارێ فلمان ب شێوێ گرۆپ بهێتە کرن، ژ پێخەمەت ئەو فلمه باش بهێته چێکرن، دیسان دڤێت دەنگ و موزیک ب رەنگەکێ باش بهێته چێکرن، ژیان هەموو ریتم و موزیکە، هەروەسا دڤێت مرۆڤ ژ هەموو کەسان فێری کاری ببیت، دڤێت مرۆڤ موزیکێ بۆ ناخێ خوە چێکەت و پاشی بۆ هەموو خەلکێ، چونکی موزیک هەستە و دیسان چێکرنا فلمان ژی زانستەکە.
ل دوماهیا پانێلێ بەرهەڤبوویان چەندین پرسیار پێشکێشی پانێلیستان کرن و دانوستاندن ل سەر چەندین تەوەرێن موزیکێ هاتنە کرن.