ئەڤرۆ پەرلەمانتارێن کورد ل بەغدا بایكۆتا روونشتنا پەرلەمانێ عێراقێ کریه دەربارەی بوودجەیێ سالا 2018
ئەڤرۆ نیۆز ، زنار تۆڤی:
نەجیبا نەجیب ئەنداما لیژنا ئابووری و وەبەرهێنانێ ل پەرلەمانێ عێراقێ بۆ ئەڤرۆ نیۆز راگەهاندیە،کو ئەڤرۆ ل دەمژمێر 11:30 کۆمبوونا پەرلەمانێ عێراقێ دەستپێکریە و وەسا بریارە خواندنا ئێکێ بۆ پرۆژە یاسایێ بودجەی بهێته کرن، بەلێ مە وەک فراکسیۆنێن كوردستانی بایكۆتا وێ كۆمبوونێ کریە،ئەم پشکداریێ د روونشتنێن پەرلەمانیدا ناکەین و چو پەرلەمانتار ژی نەچووینە دناڤا هۆلا پەرلەمانیدا.
هەروەسا دیارکریە،د ماوێ بوریدا مە وەک پەرلەمانتارێن کوردستنی و سوننەیان تێبینیێن خۆ دەربارەی پرۆژە یاسایێ بوودجێ سالا 2018 ئاراستەی سەرۆکاتیا پەرلەمانی کرینە، بۆ هندێ کو د پرۆژە یاسایێ بوودجێ گشتی یێ عێراقێدا بهێنە جێگیر کرن، بەلێ هەتا نوکە ئەو داخوازی نەهاتینە جێبەجێ کرن و بریارە ئەڤرۆ چارشەمبی جارەکادیتر پەرلەمان وی پرۆژە یاسای بێخیتە بەرنامەیێ كاری بۆ هندێ کو خواندنا ئێکێ بۆ وی پرۆژە یاسای بهێتە کرن،لێ وەکو دیار پەرلەمان ئەڤرۆ نەشێت خواندنا ئێکێ بۆ بکەت،چونکی داخوازیێن کورد و سونەیان ل بەرچاڤ نەهاتینە وەرگرتن و رێژا یاسایی ژی تەما نەبوویە.
هەروەسا نەجیبایێ دیارکریە،مە سەرۆکێ پەرلەمانی ل سەر ڤی بابەتی هایدارکریە،کو ئەم وەک فراكسیۆنێن كوردستانی ل پەرلەمانێ عێراقێ ئەڤرۆ پشکداریێ د وێ كۆمبوونێدا ناکەین، چونكی داخوازیێن مە كوردان نەهاتینە جێبەجێ كرن،هەر چەندە ئەم دزانین چو گرەنتی بۆ جێبەجێكرنا داخوازیێن مە نینن و مە هیڤی ب عێراقێ نەماینە،لەورا ئەڤرۆ مە هەموو پەرلەمانتارێن کورد بایكۆتا كۆمبوونێ کریە.
وەکو دیار گرنگترین داخوازیێن كوردان د بوودجەیێ سالا 2018 پێکهاتینە ژ پشكا هەرێما كوردستانێ کو ژ ١٧% وەك بەری نوکە ب مینیت و نەهێتە كێمکرن و دیسا ناڤێ پارێزگەهێن هەرێما كوردستانێ بۆ حوکمەتا هەرێما كوردستانێ بهێتە گوهۆرین، بەلێ هەتا نوکە ئەو داخوازیێن كوردان نەهاتینە جێبەجێ كرن.
