ئەڤرۆ پەرلەمان دێ ل دۆر مووچەی کۆم بیت
ئه‌ڤرۆ نيوز:
بڕیارە ئەڤرۆ 18ى ئيلۆنا 2017ێ سەرۆکایەتیا پەرلەمانێ کوردستانێ دگەل لیژنێن پەیوەندیدار و فڕاکسیۆنێن پەرلەمانی ل دۆر پرسا پێداچوونێ ب سیستەمێ مووچێ فەرمانبەران کۆم ببیت، د ڤی واری دا پەرلەمانتارەک دیار دکەت ھەموو بزاڤ دێ ھێتەکرن کو پاشکەفت ل سەر مووچێ فەرمانبەران بھێتە لادان و دانا مووچا ئاسایی ببیت.
سەرۆکایەتیا پەرلەمانێ کوردستانێ دوھی رۆژا ئێک شەمبی راگەھاندنەک بەلاڤ کر و وێنەیەک گەھشتیە رۆژاناما ئەڤرۆ و تێدا ھاتیە (داخوازێ ژ لیژنێن پەیوەندیدارێن پەرلەمانی دکەین ئەڤرۆ رۆژا دوشەمبی بەرھەڤی کۆمبوونا سەرۆکایەتیا پەرلەمانی ببن ب مەرەما دانوستانان ل دۆر بەرھەڤکرنا پڕۆژەکی بۆ پێداچوونا مووچێ فەرمانبەران).
نازم کەبیر، پەرلەمانتارێ فڕاکسیۆنا پارتی ل پەرلەمانێ کوردستانێ بۆ رۆژناما ئەڤرۆ گۆت “پەرلەمانێ کوردستانێ دێ پشتی ریفڕاندۆمێ ل سەر کۆمبوونێن خوە بەردەوام بیت و ئێک ژکارێن پەرلەمانی دێ کارکرن بیت ل دۆر پرسا مووچە و باشکرنا رەوشا ئابووریا ھەرێما کوردستانێ، لەوڕا دێ پڕۆژە ھێنە بەرھەڤکرن ژلایێ لیژنێن پەیوەندیدار و فڕاکسیۆنێن پەرلەمانی ڤە ھەتا د کۆمبوونێن داھاتی دا بکەڤیتە د ناڤا کارناما کۆمبوونێن پەرلەمانی دا و چارەسەریەک بۆ لادانا پاشکەفتێ ل سەر مووچێ فەرمانبەران بھێتە دیتن، لەوڕا ئەز پێشبینی دکەم پەرلەمان د ڤی بیاڤی دا رۆلێ خوە ببینیت و ل نێزیک بڕیارا خوە بۆ پێداچوونا سیستەمێ مووچەی بدەت”.
