ئەڤرۆ چەکێن پارێ جۆتیارێن دھۆکێ دێ ھێنە بەلاڤکرن
ئەڤرۆ نيوز:
رێڤەبەرێ کۆمپانیا بازرگانیا داخلودانی ل پارێزگەھا دھۆکێ بۆ رۆژناما ئەڤرۆ ئاشکرا کر کو پارێ گەنمێ جۆتیارێن پارێزگەھا دھۆکێ د گەل چەکان دوھی رۆژا 24/5/2016 گەھشتیە بانکێن پارێزگەھا دھۆکێ و ئەڤرۆ رۆژا 25/5/2016 ێ چەک ل سەر جۆتیاران دێ ھێنە بەلاڤکرن.
نازم محەمەد عەلی، رێڤەبەرێ کۆمپانیا بازرگانیا داخلودانی ل پارێزگەھا دھۆکێ دیار کر کو شەش ملیار و 415 ملیۆن دینارێن پارێ گەنمێ جۆتیارێن پارێزگەھا دھۆکێ د گەل چەکان گەھشتینە بانکێن پارێزگەھا ناڤبری و ئەڤرۆ چەک ل سەر جۆتیاران دێ ھێنە بەلاڤکرن و گۆت: “ئەڤ پارێ گەنمێ جۆتیاران یێ سالا 2015ێ یە و ل دووڤ رێزبەندیا وەرگرتنا گەنمی دێ ل سەر وان ھێتە بەلاڤکرن”.
ناڤبری ئاماژە دا وێ چەندێ کو ژ سەرجەمێ وی پارەی دو ملیار و 303 ملیۆن دینار بۆ سایلۆیا شێخان و دو ملیار و 42 ملیۆن دینار بۆ سایلۆیا فەیدیێ و ملیارەک و 349 ملیۆن دینار بۆ بنگەھێ رۆڤیا و 725 ملیۆن دینار بۆ سایلۆیا زاخۆ ھاتینە رەوانەکرن و گۆت: “ھەتا نوکە وەزارەتا بازرگانیا عیراقێ بۆ سالا 2014 ب کوژمێ 42 ملیار دیناران و بۆ سالا 2015 ژ بلی وان شەش ملیار و 415 ملیۆن دینارێن ھنارتین ب کوژمێ 179 ملیار دیناران دەیندارا جۆتیارێن پارێزگەھا دھۆکێ یە”.
ناڤھاتی خویا کر کو نوونەرێ کۆمپانیا بازرگانی یا داخلودانی تایێ دھۆکێ دوھی رۆژا 24/5/2016 ل تایێ گشتی یێ کۆمپانیا بازرگانی یا داخلودانی ل بەغدا چەکەکێ دی ب کوژمێ 32 ملیار دیناران وەرگرتیە و دێ بۆ بەنکا داسنیا و پاش بۆ بەنکا ھەرێمێ یا مەرکەزی ھێتە رەوانەکرن ھەتا ئەو پارە دھێت.