ئەڤرۆ 39 ملیارێن جۆتیارێن دھۆکێ دێ گەھن
ئه‌ڤرۆ نيوز:
ئەندامەکێ لیژنا چاندنێ ل پەرلەمانێ کوردستانێ ئاشکرا کر کو بڕیارە ئەڤرۆ رۆژا 8ى شوباتا 2018ێ 39 ملیار دینارێن پارێ کڕینا گەنمێ جۆتیارێن پارێزگەھا دھۆکێ بگەھیتە باژێڕێ دھۆکێ و گۆت: ” لیژنەکا پەرلەمانی دێ سەرەدانا نەتەوێن ئێکگرتی کەت داکو گڤاشتنان بکەنە سەر بەغدا بۆ دانا مافێن جۆتیارێن ھەرێمێ”.
زیاد حسێن، ئەندامێ لیژنا چاندنێ ل پەرلەمانێ کوردستانێ بۆ رۆژناما ئەڤرۆدیار کر کو بڕیارە ئەڤرۆ پارێ جۆتیارێن پارێزگەھا دھۆکێ بۆ سالێن 2016 و 2017ێ بگەھیتە پارێزگەھا دھۆکێ و ل سەر جۆتیاران بھێتە بەلاڤکرن، پارێ جۆتیارێن دھۆکێ نوکە ل بانکێن ھەولێرێ یە و گۆت: ” بڕیارە ئەڤرۆ 17 ملیار دینارێن سالا 2017ێ و 22 ملیار دینارێن سالا 2016ێ بۆ بەنکێن باژێڕێ دھۆکێ بھێنە ھنارتن و ل سەر جۆتیارێن گەنم دایە بەغدا بھێتە بەلاڤکرن، بەلێ ھێشتا پارێ جۆتیارێن دھۆکێ و کوردستانێ یێن بەری ڤان سالان دمینیتە ل دەف حوکمەتا بەغدا”.
ناڤھاتی ئاماژە دا وێ چەندێ کو ب مەرەما وەرگرتنا مافێن جۆتیارێن ھەرێما کوردستانێ کو ئەڤە چەندین سالە بەغدا غەدرێ ل جۆتیارێن ھەرێمێ دکەت وان وەکو لیژنا چاندنێ ل پەرلەمانێ کوردستانێ سەرۆکاتیا پەرلەمانی ئاگەھدارکریە ل ڕۆژێن داھاتی دێ لیژنەک ھێتە پێکئینان و داکو سەرەدانا نەتەوێن ئێکگرتی و نوونەراتیا وەلاتێن بیانی ل ھەرێما کوردستانێ بکەن و گڤاشتنان بێخنە سەر حوکمەتا عیراقێ بۆ مەزاختنا پارێ کڕینا گەنمێ جۆتیارێن ھەرێما کوردستانێ و داخوازێ ژ بەغدا بکەن ئەڤێ زۆلم و غەدرا ل جۆتیارێن ھەرێمێ دھێتە کرن بھێتە راگرتن.
