ئەڤین ھروری: پارتی دێ ھژمارا لقێن خوە کێم کەت
ئەڤرۆ نیوز:
ئەندامەکا جڤاتا سەرکردایەتیا پارتی دیموکراتی کوردستان بەحسێ بجە ئینانا پڕۆسا چاکسازیێ دناڤ پارتی دا دکەت و ئیماژە بڤێ چەندێ دکەت، حەفت لیژنە بۆ چاکسازیا ناف پارتی ھاتینە پێکئینان، ھەروەسا دیارکر، پارتی دێ ھژمارا لقێن خوە کێم کەت و ئەگەر جڤاتێن سەرکردایەتیێن پارێزگەھا بمینن ئەڤە دێ سەرکردایەتیا پارتی ل بەھدینان ھێتە ڤەکرن.
ئەڤین ھروری، ئەنداما جڤاتا سەرکردایەتیا پارتی دیموکراتی کوردستان بۆ رۆژناما ئەڤرۆ گۆت” ل ھەیڤا نیسانا بۆری پڕۆژێ چاکسازیێ ژلایێ سەرۆک بارزانی ڤە بۆ ناڤا پارتی دیموکراتی کوردستان و حوکمەتا ھەرێما کوردستانێ ھاتە راگەھاندن، ل دەستپێکا ھەیڤا ئەیارێ وەرە، حەفت لیژنە بۆ چاکسازیا ناڤ پارتی دیموکراتی کوردستان ھاتینە پێکئینان و ئەف لیژنە یێ کاردکەن بۆ دیراسەتکرنا چاوانیا ئەنجامدانا چاکسازیێ دناف پارتی دیموکراتی کوردستان، کو ئەزژی دناف ئەڤان لیژنادامە، ناف دامو دەزگەھێن حوکمەتا ھەرێما کوردستانێ ژی پڕۆسا چاکسازیێ دەستپێکریە و چەند رێڤەبەر ب تۆمەتا گەندەلیێ ھاتینە دەستەسەرکرن و ڤەکۆلین دگەلدا ھاتیەکرن، بەلێ من چو زانیاری لدۆر ھژمارا وان کەسێن ھاتینە دەستەسەرکرن نینن.
لدۆر گوھۆڕینێن سیستەمێ رێکخستنا پارتی ئەڤین ھروری گۆت: لیژنەک بۆ رێکخستنا ناڤ پارتی ھاتیە پێکئینان و ھەکە بڕیار بیت جڤاتێن سەرکردایەتیێن پارێزگەھان بمینن وەکی نوکە ل سلێمانی و ھەولێرێ ھەنە، ئەڤە جڤاتا سەرکردایەتیا پارتی لپارێزگەھا دھۆکێ بۆ دەڤەرا بەھدینان ژی دێ ھێتە ڤەکرن، د بەرنامەیدایە پارتی ھژمارا لقێن خوە یێن حزبی کێم بکەت و لیژنە دێ پێشنیارێ لدۆر ڤێ چەندێ دەتە مەکتەبا سیاسی و مەکتەبا سیاسی دێ بڕیارێ لدۆر کێمکرنا لقێ، حزبێ بدەت، ھەروەسا گوھۆڕین دێ بسەر سیستەمێ رێکخستنا پارتی دا ھێت.
ھەروەسا ئەنداما رێکخستنا پارتی گۆت: مەرەم ژڤێ گوھۆڕینێ ئەوە پارتی پتر ب بیتە پارتەکا مەیدانی و جەماوەری، چونکە سەرکەفتنا پارتی ژی ھەر دڤێ چەندێدا بۆیە پارتەکا جەماوەری بوویە، سیستەمێ حزبێ یێ بەری نوکە ھەی دگەل قۆناغا نوکە ناگونجیت، ژبەرکو دگەل ڤێ قۆناغێ بگونجیت و پارتی بەرەف پێشڤەبچیت گوھۆڕین دێ ھێنەکرن، ل ئایندەیەکێ نێزیک ئەف گوھۆڕینێن ناف پارتی دێ ھێنەکرن.